ރާއްޖޭގެ ޕާސްޕޯޓް ސްޓޮކް މެނޭޖްކުރުމުގެ ގޮތުން، ދިވެހި ޕާސްޕޯޓް ދޫކުރުމުގެ އުސޫލަށް މުހިންމު ބަދަލުތަކެއް ގެނައުމަށް މޯލްޑިވްސް އިމިގްރޭޝަނުން ނިންމައިފިއެވެ.
މޯލްޑިވްސް އިމިގްރޭޝަނުން ނެރުނު ބަޔާނެއްގައި ހާމަކޮށްފައިވާ ގޮތުގައި، މި ބަދަލުތައް ގެންނަން ނިންމީ އޮގަސްޓް 28 ވަނަ ދުވަހުން ފެށިގެންނެވެ. މިގޮތުން ގެނެވުނު މައިގަނޑު އެއް ބަދަލަކީ، ރާއްޖޭގައި ތިބެގެން ޕާސްޕޯޓުގެ މުއްދަތު ހަމަވެގެން އައު ޕާސްޕޯޓަކަށް އެދޭ ފަރާތްތަކަށް އައު ޕާސްޕޯޓެއް ދޫކުރުމުގެ ބަދަލުގައި، މިހާރު އޮތް ޕާސްޕޯޓުގެ މުއްދަތު 30 ޖޫން 2027 ގެ ނިޔަލަށް އިތުރުކޮށްދިނުމެވެ. މީގެއިތުރުން، އަލަށް ޕާސްޕޯޓް ހައްދާ މީހުންގެ ތެރެއިން އިންޑިއާ އަދި ސްރީލަންކާ ފަދަ އާންމުކޮށް ދިވެހިން ކުރު މުއްދަތަކަށް ދަތުރުކުރާ ޤައުމުތަކަށް ފުރާ ފަރާތްތަކަށް 1 އަހަރުގެ މުއްދަތު ހިމެނޭ ”އިމަޖެންސީ ޕާސްޕޯޓް“ ދޫކުރުމަށްވެސް ވަނީ ހަމަޖެހިފައެވެ.
އިމިގްރޭޝަނުން ވިދާޅުވީ، 8 ސަފްހާގެ މައްޗަށް އެކުލެވޭ މި އިމަޖެންސީ ޕާސްޕޯޓަކީ އިންޓަނޭޝަނަލް ސިވިލް އޭވިއޭޝަން އޮގަނައިޒޭޝަން (އައިކާއޯ) ގެ މިންގަނޑުތަކަށް ފެތޭ މެޝިން ރީޑަބަލް ޕާސްޕޯޓެއް ކަމަށެވެ. އަދި ޕާސްޕޯޓުގެ މުއްދަތު އިތުރުކޮށްދިނުމާއި، އިމަޖެންސީ ޕާސްޕޯޓް ދޫކުރުމުގެ ޚިދުމަތްވެސް ރައްޔިތުންނަށް ފޯރުކޮށްދޭނީ އެއްވެސް ފީއަކާ ނުލައި މުޅިން ހިލޭ ކަމަށް އެ އިދާރާއިން ފާހަގަކުރެއެވެ.
މި ފިޔަވަޅުތައް އަޅަންޖެހުނު ސަބަބު ބަޔާންކުރަމުން އިމިގްރޭޝަނުން ބުނީ، 2016 ވަނަ އަހަރުން ފެށިގެން ރާއްޖެއަށް ޕާސްޕޯޓް ބުކްލެޓް ފޯރުކޮށްދެމުން އަންނަ ޖަރުމަނުވިލާތުގެ ކުންފުނީގެ ޕްރިންޓް ހައުސްގެ މެޝިންތަކަކަށް މައްސަލަތަކެއް ކުރިމަތިވި ކަމަށެވެ. އެ މައްސަލަ މިހާރު ހައްލުކުރެވިފައި ވީނަމަވެސް، ލަފާކުރި ތާރީޚަށް ރާއްޖެއަށް ބުކްލެޓްތައް ފޯރުކޮށްދިނުމުގައި ދަތިތަކެއް ހުރުމުން ސްޓޮކް ދެމެހެއްޓުމަށްޓަކައި މި ނިންމުން ނިންމަން ޖެހުނީ ކަމަށެވެ.
2026 އޮގަސްޓު 28 ވަނަ ދުވަހުން ފެށިގެން ދިވެހި ޕާސްޕޯޓު ދޫކުރުމުގައި ގެންނަން ނިންމާފައިވާ ބަދަލުތައް.
އިތުރަށް ވިދާޅުވުމަށް:https://t.co/oFPCLKmy3a pic.twitter.com/qAfr1kmYAF
— Maldives Immigration (@ImmigrationMV) August 27, 2026
ފާއިތުވި 10 އަހަރުގެ ތެރޭގައި ޕާސްޕޯޓް ފޯރުކޮށްދިނުމުގައި އެއްވެސް މައްސަލައެއް ދިމާވެފައިނުވާ އެ ކުންފުންޏާއެކު ދިމާވި މި ދަތި ހާލަތުގައިވެސް، ދިވެހި އެއްވެސް ރައްޔިތަކަށް ރާއްޖެއިން ބޭރަށް ދަތުރުފަތުރު ކުރުމުގައި އެއްވެސް ހުރަހެއް ނޭޅޭނެ ކަމުގެ ފުރިހަމަ ޔަޤީންކަން މޯލްޑިވްސް އިމިގްރޭޝަނުން ވަނީ އަރުވާފައެވެ.
