ކުށްކޮށްގެން ހޯދާފައިވާ މުދާ ދައުލަތަށް ނެގުމާ ގުޅޭ ބިލު ރައްޔިތުންގެ މަޖިލީހަށް ހުށަހެޅުމާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން އެކަމަށް ތާއީދުކޮށް، މަރުހަބާ ކިޔައިފިއެވެ.
މިކަމާ ގުޅިގެން އޭސީސީން ނެރުނު ބަޔާނެއްގައި ބުނެފައިވަނީ، ސަރުކާރުގެ ފަރާތުން މިފަދަ ބިލެއް ރައްޔިތުންގެ މަޖިލީހަށް ހުށަހެޅުމަކީ ކޮރަޕްޝަނާ ދެކޮޅަށް ރާއްޛޭގައި ކުރާ މަސައްކަތުގައި ފާހަގަކޮށްލެވޭ ތާރީހީ މުހިއްމު ފިޔަވަޅެއް ކަމަށެވެ. އަދިހަމައެހެންމެ، މި ބިލުގެ ސަބަބުން ކޮރަޕްޝަނުގެ ކުށްތައް ހުއްޓުވުމަށާއި ބޮޑެތި ކުށްތަކުން ހޯދާ ނުހައްގު މަންފާ އަނބުރާ ދައުލަތަށް ނެގުމުުގެ އިތުރުން ގާނޫނާ ހިލާފަށް ހޯދާ މުއްސަނދިކަން ކުށްވެރިންނަށް ލިބުން ހުއްޓުވުމަށް ބޭނުންވާ ގާނޫނީ އޮނިގަނޑެއް ގާއިމްކުރެވިގެންދާނެ ކަމަށް ވެސް އެ ކޮމިޝަނުން ބުނެފައިވެއެވެ.
އެއީ ކުރިމަގުގެ ޖީލުތަކަށްޓަކައި ދައުލަތުގެ ވަސީލަތްތައް ރައްކާތެރިކުރުމަށް މުއައްސަސާތަކުން ކުރަމުން އަންނަ މަސައްކަތަށް ވެސް ލިބުނު ބާރެއްގެ ގޮތުގައި އޭސީސީން ސިފަކުރިއެވެ. އެ ކޮމިޝަނުން ބުނީ ރާއްޖޭގެ ގާނޫނުގެ ވެރިކަން ނަގަހައްޓައި، އެންމެ މަތީ ދަރަޖައިގެ އިންސާފު ގާއިމުކުރުމަށް އެ ނިޒާމު އެންމެ ފުރިހަމަ ގޮތުގައި ހިންގުމަށް ދައުލަތުގެ މުއައްސަސާތަކާއި ބައިނަލްއަގްވާމީ ބައިވެރިންނާ އެކު ގާތުން މަސައްކަތްކުރުމުގައި އެ ކޮމިޝަނުން ދެމި އޮންނާނެ ކަމަށެވެ. އަދި ކޮމިޝަނުގެ އުއްމީދަކީ އެ ބިލް ފާސްކޮށް، ތަންފީޒުކުރުން ކަމަށް ބުންޏެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅި މައިގަނޑު މަގުސަދަކީ، ޖިނާއީ ބޮޑެތި ކުށްތައް ކޮށްގެން މާލީ ގޮތުން ހޯދާ ކުރިއެރުންތައް ހުއްޓުވުމަށާއި، ނުހައްގުން ހޯދާ މުދާ ދައުލަތަށް ނެގުމުގެ އިތުރުން އެ މުދަލުން އިތުރު މަންފާއެއް ހޯދޭނެ މަގުތައް ބަންދުކުރުމެވެ. މި ބިލުގައި ބަޔާންކޮށްފައިވާ ގޮތުގައި ކުށްކޮށްގެން ހޯދާ މުދަލާއި ކުށްކުރަން ބޭނުންކުރާ މުދާ ވެސް ދައުލަތަށް ނެގޭނެއެވެ.
ދައުލަތަށް މުދާ ނެގޭނެ ކުށްތަކުގެ ތެރޭގައި ހިމެނެނީ، މަނީ ލޯންޑަރިން އާއި ޓެރަރިޒަމާ ގުޅުން ހުރި ކުށްތަކާއި މީހަކު މެރުމާއި މަސްތުވާތަކެއްޗާއި މީހުންނާއި ހަތިޔާރު ޓްރެފިކް ކުރުމާއި އެކްސްޕްލޮއިޓޭޝަންގެ އަމަލު އެކުލެވޭ ޖިންސީ ކުށާއި ކައުންޓާފިޓް ކުރުމާއި ކޮރަޕްޝަން ފަދަ ބޮޑެތި ކުށްތަކެވެ.
ހަމައެހެންމެ، ޓެކްސް ދެއްކުމުން އެއްކިބާވުމުގެ ކުށުގެ ތެރެއިން 500،000 ރުފިޔާއިން މަތީ ފައިސާގެ އަދަދު ހިމެނޭ ކުށްތަކާއި ފޭރުމާއި ވައްކަމާއި ހިޔާނާތާއި މުދާ ސްމަގަލް ކުރުންފަދަ ކުށްތަކުގެ ތެރެއިން 100،000 ރުފިޔާއިން މަތީގެ ފައިސާގެ އަދަދު ހިމެނޭ ކުށްތަކާއި ޖިނާއީ ބޮޑު ކުށެއް ކަމުގައި ގާނޫނުގައި ކަނޑައަޅާފައިވާ ކުށްތަކުގެ ތެރެއިން ކުށްކޮށްގެން މުދާ ހޯދޭނެ ކޮންމެ ކުށެއްގައި ވެސް ދައުލަތަށް މުދާ ނެގޭނެ ކަމަށް ބިލުގައި ބަޔާންކޮށްފައިވެއެވެ.
ދައުލަތަށް މުދާ ނެގުމުގައި ޕްރޮސެކިއުޓަރ ޖެނެރަލްގެ އިރުޝާދުތަކަށް ރިއާޔަތްކުރުމަށް ހަމަޖެހިފައިވާއިރު، ބިލުގައި ބަޔާންކޮށްފައިވާ ކުށްތަކާ ގުޅުންހުރި ކަންކަމުގައި އެހެން ގައުމުތަކުގެ އެހީތެރިކަމަށް އެދުމުގެ ބާރު ވެސް ޕްރޮސެކިއުޓަރ ޖެނެރަލަށް މި ބިލާއެކު މިހާރު ވަނީ ލިބިދީފައެވެ. ކުށްކޮށްގެން ހޯދާ މުދާ ހިފެހެއްޓުމުގެ އުސޫލުތަކާއި ބޭރު ގައުމުތައް މެދުވެރިކޮށް ކުށްކޮށްގެން ހޯދާ މުދާ ހިފެހެއްޓުމާއި ދައުލަތަށް ނެގުމުގެ އުސޫލުތައް ފުރިހަމައަށް ބަޔާންކޮށްފައިވެއެވެ.
