ސިޔާސީ ވާދަވެރިންގެ ވާހަކަތަކަށް ރައްދު ދެއްވުމުގެ ބަދަލުގައި، ރައްޔިތުންނަށް ވެވަޑައިގެންނެވި ވަޢުދުތައް ފުއްދެވުމަށް އިސްކަންދެއްވާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިޚާބުގައި ރައީސް ޑރ. މުޢިއްޒާ ވާދަކޮށް، އެ މަނިކުފާނު ބަލިކުރެވޭނެކަމަށް ބައެއް ސިޔާސީ ފަރާތްތަކުން ދަނީ ތަކުރާރުކޮށް ބުނަމުންނެވެ. މި ކަމާ ގުޅޭ ގޮތުން ޕީއެސްއެމްގެ ”ނޭޝަން ޗެޓް“ ޕްރޮގްރާމްގައި ދެންނެވި ސުވާލަށް ޖަވާބު ދެއްވަމުން ރައީސް ވިދާޅުވީ، ވާދަވެރިންގެ ވާހަކަތަކަށް ވިސްނެވުމުގެ ބަދަލުގައި، ރައްޔިތުންނަށް ވެވަޑައިގެންނެވި ވަޢުދުތައް ފުއްދެވުމަށް ސަމާލުކަން ދެއްވާ ކަމަށެވެ.
”އަޅުގަނޑު އެ ކަމާ ވިސްނައެއް ނުލަން. އަޅުގަނޑު ވިސްނަނީ ރައްޔިތުންނަށް ވީ ވަޢުދުތައް ފުއްދުމަށް. ވަޒީރުންނާއި، ރައްޔިތުންގެ މަޖިލީހުގެ މެންބަރުންނާއި، ޢާންމު ރައްޔިތުންނާ ގުޅިގެން، ހުރިހާ ފަރާތްތަކާ ގުޅިގެން ކުރިއަށް ދާނީ. ވީ ވަޢުދުތައް ފުއްދުމުގައި ކާމިޔާބު ހޯދުމަށް، ހުރިހާ ފަރާތްތަކާ ގުޅިގެން ކެނޑިނޭޅި މަސައްކަތް ކުރާނަން.“
ރައީސް ވިދާޅުވި ގޮތުގައި، ވެވަޑައިގެންނެވި ވަޢުދުތައް ތަންފީޒު ކުރެއްވުމުގައި ހުރިހާ ދާއިރާއަކުންވެސް ފާހަގަކޮށްލެވޭ ކުރިއެރުންތަކެއް ހޯދިފައިވެއެވެ. ރައްޔިތުންގެ ބޭނުންތައް ފުއްދައިދެއްވުމަށް ދެމިހުންނަވާނެ ކަމުގެ ޔަޤީންކަންވެސް ރައީސް ދެއްވިއެވެ.
ރައީސް ވިދާޅުވީ، ޤައުމުގެ އިޤްތިޞާދު ހަރުދަނާ ކުރެއްވުމާއި، ޚާރިޖީ ސިޔާސަތު ތަރައްޤީ ކުރެއްވުމާއި، އިޖްތިމާއީ ދާއިރާ ކުރިއެރުވުމާއި، ވިޔަފާރީގެ މާޙައުލު ތަރައްޤީ ކުރެއްވުމާއި، ޒުވާނުން ބިނާ ކުރެއްވުމާއި، ސިއްޙީ ދާއިރާ ހަރުދަނާ ކުރެއްވުމަށް ވެވަޑައިގެންނެވި ވަޢުދުތައް، ވަޢުދާ އެއްގޮތަށް ފުއްދެވުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ.
ރައީސްގެ ވަޢުދުފުޅުތަކުގެ ތެރޭގައި، އުމްރާނީ ތަރައްޤީ ހަލުވިކަމާ އެކު ކުރިއެރުވުމާއި، ބޯހިޔާވަހިކަމުގެ ދަތިކަމަށް ދާއިމީ ހައްލެއް ހޯއްދަވައިދެއްވުން ހިމެނެއެވެ. ހަމަ އެ ފަދައިން، ޤައުމީ ދިފާޢީ ބާރު ވަސީލަތާއި ޤާބިލިއްޔަތުގެ ގޮތުން ތަނަވަސް ކޮށްދެއްވުމާއި، ދިވެހި ޤައުމިއްޔަތު ދިރުވައި އާލާ ކުރެއްވުމަށްވެސް ރައީސް ޚާއްޞަ ސަމާލުކަމެއް ދެއްވައެވެ.
ދިވެހިރާއްޖޭގެ އިޤްތިޞާދީ ތަރައްޤީ ދެމެހެއްޓެނިވި ގޮތެއްގައި ކުރިއެރުވުމަށް މަސައްކަތްކުރެއްވުމުގެ އިތުރުން، ސިއްޙީ ދާއިރާ ހަރުދަނާ ކުރެއްވުމަށާއި، ތަޢުލީމީ ނިޒާމު ތަރައްޤީ ކުރެއްވުމަށް ގިނަ ގުނަ މަސައްކަތްތަކެއް ރައީސް ޑރ. މުޙައްމަދު މުޢިއްޒުގެ ވެރިކަމުގައި ކުރައްވާނެ ކަމަށް ވަޢުދުވެވަޑައިގެންނެވިއެވެ. ރައްޔިތުންގެ ދިރިއުޅުމުގެ ފެންވަރު ރަނގަޅު ކުރެއްވުމަށާއި، ޤައުމުގެ ހުރިހާ ދާއިރާއަކުން ކުރިއެރުން ހޯދައިދެއްވުމަށް ރައީސް ދެއްވި ޔަޤީންކަމަކީ، ރައްޔިތުން ބޮޑު އުންމީދަކާ އެކު ބަލައިގަތް ވަޢުދުތަކެއް ކަމަށް ގިނަ ބަޔަކު ދެކެއެވެ.
