ރާއްޖޭގެ ބާޒާރުގައި ބިސް ލިބުމުގައި އެއްވެސް ދަތިކަމެއް ނެތް ކަމަށާއި، އެއްވެސް ކޮންޓްރޯލެއް ނެތި އެސްޓީއޯއިން ބިސް ވިއްކަމުންދާ ކަމަށް ހާމަކޮށްފިއެވެ.
މާލެއާއި އަތޮޅުތަކުގެ ބާޒާރުން ބިސް ހުސްވެ، ކޮންޓްރޯލް ކޮށްގެން ވިއްކަމުންދާ ކަމަށް ބުނެ މީސްމީޑިއާގައި ފެތުރެމުންދާ ވާހަކަތައް ދޮގުކުރައްވައި އެސްޓީއޯއިން ވިދާޅުވީ، ބާޒާރުގައި ދަތިކަމެއް ނެތި ބިސް ލިބެން އެބަހުރި ކަމަށެވެ. އަދި ކުރިއަށް އޮތް ތަނުގައިވެސް އެއްވެސް ދަތިކަމެއް ކުރިމަތިނުވާނެހެން އިތުރު ޝިޕްމެންޓްތައް ރާއްޖެ ގެނައުމުގެ މަސައްކަތް ހުއްޓުމެއް ނެތި ކުރިއަށްދާ ކަމަށެވެ.
އަގުހެޔޮކޮށް އަދި ދެމެހެއްޓެނިވި ގޮތެއްގައި ރައްޔިތުންނަށް ތަކެތި ލިބޭނެ އިންތިޒާމު ހަމަޖެއްސުމުގެ ގޮތުން، އަސާސީ ކާބޯތަކެތީގެ ލިސްޓަށް ސަރުކާރުން ވަނީ ބިސް ހިމެނޭހެން 23 ބާވަތެއް އިތުރުކުރައްވާފައެވެ. މި ބަދަލު ރަސްމީކޮށް އިޢުލާންކުރެއްވީ މިދިޔަ އަހަރުގެ ސެޕްޓެންބަރު މަހުގެ ތެރޭގައެވެ. އަދި އޭގެ އެއްމަސް ފަހުން އެ ބާވަތްތައް ރާއްޖެ އެތެރެކޮށް ބާޒާރަށް ނެރެ ވަނީ ވިއްކަން ފަށާފައެވެ.
އަސާސީ މިފަދަ މުހިންމު ބާވަތްތައް މެދުކެނޑުމެއް ނެތި ބާޒާރުން ލިބެން ހުރިކަން ކަށަވަރު ކުރުމަށްޓަކައި އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ދަނީ ޤަވާއިދުން މާކެޓް މޮނިޓަރ ކުރަމުންނެވެ.
މީގެއިތުރުން، އެސްޓީއޯއާއި އަމިއްލަ ވިޔަފާރިތައް ގުޅިގެން މުދާ ހުސްނުވެ ލިބޭނެ އިންތިޒާމު ހަމަޖައްސަމުންދާއިރު، ބާޒާރުގައި އެއްވެސް ބާވަތެއްގެ މުދަލެއް މަދުވާނަމަ ނުވަތަ އަގު އުފުލޭނަމަ، އެސްޓީއޯ މެދުވެރިކޮށް ވަގުތުން އެ މުދަލެއް އެތެރެކޮށް ބާޒާރުގެ އަގުތައް ހަމަހަމަކަންމަތީ ހިފަހައްޓަމުން ގެންދާނެ ކަމުގެ ފުރިހަމަ ޔަޤީންކަން ސަރުކާރުން ދެއެވެ.
