ދެކުނު ލުބުނާނުގެ ނަބަޠިއްޔާ ސަރަޙައްދުގައިވާ ޢަލީ އަލް-ޠާހިރު އުސްބިމަށް އަމާޒުކޮށް އިސްރާއީލުގެ ހަނގުރާމަމަތީ ބޯޓުތަކުން ދެ ފަހަރެއްގެ މަތިން ވަރުގަދަ ވައިގެ ހަމަލާތަކެއް ދީފިއެވެ. ލުބުނާނުގެ ޤައުމީ ނޫސް އޭޖެންސީ (އެން.އެން.އޭ) އިން ރިޕޯޓުކޮށްފައިވާ ގޮތުގައި، މިއަދު ހެނދުނު ދިން މި ޙަމަލާތަކުގައި ބާރުގަދަ މިސައިލްތަކެއް ބޭނުންކޮށްފައިވާއިރު، މި ޙަމަލާތަކުގެ ކުރިން ރޭގަނޑުގެ ވަގުތުތަކުގައިވެސް އިޒްރޭލު ސިފައިން ވަނީ އެ ސަރަޙައްދަށް އާޓިލަރީ ޙަމަލާތަކެއް ދީފައެވެ.
ޙަމަލާތައް އަމާޒުވެފައިވަނީ ނަބަޠިއްޔާ އަލް-ފައުޤާގެ އުތުރުގެ ސަރަޙައްދުގައިވާ ޢަލީ އަލް-ޠާހިރު އުސްބިމަށެވެ. ޢަލީ އަލް-ޠާހިރު އުސްބިމަކީ ދެކުނު ލުބުނާނާއި އިޒްރޭލުގެ އުތުރުގެ ބޯޑަރު ސަރަޙައްދު ސާފުކޮށް ފެންނަ، އަސްކަރީ ގޮތުން ނުހަނު މުހިންމު އުސްބިމެކެވެ.
’ޞުލްޙައިގެ އެއްބަސްވުންތައް‘ އެމެރިކާގެ ’ގެރެންޓީ‘ އާއެކު ނަމެއްގައި އޮތް ނަމަވެސް، އިޒްރޭލުން ދަނީ ކެނޑިނޭޅި ދެކުނު ލުބުނާނުގެ ތަފާތު ސަރަޙައްދުތަކަށް ކޮންމެ ދުވަހަކުވެސް ވައިގެ އަދި އާޓިލަރީ ޙަމަލާތައް ދެމުންނެވެ.
