ތިލަމާލެ ބްރިޖު މަޝްރޫއުގެ ފެންވަރާ މެދު އެއްވެސް ޝައްކެއް ނެތް ކަމަށާއި، އެ މަޝްރޫއުގެ އަމަލީ މަސައްކަތް އަންނަ 2027 ވަނަ އަހަރުގެ ނިޔަލަށް އެއްކޮށް ނިންމާލެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދައުލަތުގެ މީޑިއާ، ޕީއެސްއެމްއިން ގެނެސްދޭ ”ނޭޝަން ޗެޓް“ ޕްރޮގްރާމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ސިނަމާލެ ބްރިޖުގެ ކޮލިޓީ ކަށަވަރުކުރި ކުންފުނިން ތިލަމާލެ ބްރިޖުގެ ފެންވަރު ވެސް ވަރަށް ގާތުން ބަލަހައްޓަމުންދާ ކަމަށެވެ. އަދި އޭރު ސިނަމާލެ ބްރިޖުގެ ކަންކަމުގައި އިސްކޮށް ހަރަކާތްތެރިވި ޑިރެކްޓަރު މި މަޝްރޫއުގައި ވެސް އަމަލީ ގޮތުން ބައިވެރިވެވަޑައިގަންނަވާތީ، ބްރިޖުގެ ފެންވަރާ މެދު އެއްވެސް ޝައްކެއް ނުކުރައްވާ ކަމަށް އެމަނިކުފާނު ވިދާޅުވިއެވެ.
މި މަޝްރޫއުގެ ދަށުން މާލެއާއި ވިލިމާލެއާ ދެމެދު މިހާރު ގުޅައިލެވިފައިވާކަން ފާހަގަކުރައްވަމުން ރައީސް ވިދާޅުވީ، ގުޅީފަޅާ ހަމައަށް ބްރިޖު ގުޅައިލުމުން ތާރުއެޅުމުގެ މަސައްކަތް ފެށިގެންދާނެ ކަމަށެވެ. މި މަޝްރޫއު އެއްކޮށް ފުރިހަމަވެގެންދާނީ ތިލަފުށްޓާ ހަމައަށް ގުޅާލެވުމުން ކަމަށް ރައީސް ވަނީ ވިދާޅުވެފައެވެ. މީގެ އިތުރުން، ބްރިޖުގެ މަސައްކަތްތައް އެއްކޮށް ނިންމައި އާންމުންނަށް ހުޅުވާލުމަކީ ސަރުކާރުގެ ބޮޑު އަމާޒު ކަމަށް ވެސް އެމަނިކުފާނު ވިދާޅުވިއެވެ.
”ތިލަމާލެ ބްރިޖްގެ ހުރިހާ މަސައްކަތްތަކެއް އަހަރެއްހާ ދުވަހުގެ ތެރޭގައި ނިންމާލެވޭނެކަމަށް އުންމީދުކުރަން. ތިލަފުއްޓާ ހަމައަށް ގުޅާލައިގެން މުޅި މަޝްރޫއު ނިންމާލެވޭނީ“ – ރައީސް ވިދާޅުވިއެވެ.
ފާހަގަކޮށްލެވޭ ގޮތުގައި، ނިމިދިޔަ އެމްޑީޕީ ސަރުކާރު ނިމުނުއިރު، ތިލަމާލެ ބުރިޖުގެ ނިމިފައިވަނީ އެންމެ 30 އިންސައްތަ މަސައްކަތެވެ. ނަމަވެސް ރައީސް މުޢިއްޒު ވެރިކަމާ ހަވާލުވެވަޑައިގެން މިވީ ކުރު މުއްދަތުގެ ތެރޭގައި އިންޑިއާ ސަރުކާރާއެކު ކުރެވުނު މުހިއްމު މަޝްވަރާތަކުގެ ސަބަބުން މަސައްކަތުގެ ދުވެލި ވަނީ ހަލުވިކުރެވިފައެވެ. އެގޮތުން މަޝްރޫއުގެ 76.1 އިންސައްތަ މަސައްކަތް މިހާރު ވަނީ އެއްކޮށް ނިންމާލެވިފައެވެ.
