އެމެރިކާގެ ޚާރިޖިއްޔާއިން (ސްޓޭޓް ޑިޕާޓްމަންޓް) ’ޓެރަރިޒަމަށް ވާގިވެރިވާ ޤައުމުތަކުގެ ލިސްޓުން‘ ސޫރިޔާ ރަސްމީކޮށް އުނިކޮށް، އެ ޤައުމާ ދެކޮޅަށް އަޅާފައިވާ ދިގު މުއްދަތުގެ އިޤްތިޞާދީ ދަތިކުރުމުގެ ފިޔަވަޅުތަކަށް ބޮޑެތި ލުއިތަކެއް ދީފިއެވެ. މިއީ 1979 ވަނަ އަހަރަށްފަހު، 47 އަހަރު ދުވަސް ވަންދެން ސޫރިޔާ އެ ލިސްޓުގައި އޮތުމަށްފަހު އެމެރިކާއިން ނިންމި ތާރީޚީ ނިންމުމެކެވެ.
މީގެ އިތުރުން، ސޫރިޔާގެ މިހާރުގެ ރައީސް އަޙްމަދު އަލް-ޝަރާ ކުރީގެ ނަމުންނަމަ އަބޫ މުޙައްމަދު އަލްޖޫލާނީ އިސްކޮށް ހުރި ކުރީގެ ހަނގުރާމަވެރި ޖަމާޢަތް، ’ހައިއަތު ތަޙްރީރު އަލް-ޝާމް‘ (އެޗް.ޓީ.އެސް) އާ ދެކޮޅަށް އޮތް ”ބައިނަލްއަޤްވާމީ ޓެރަރިސްޓް ޖަމާޢަތުގެ“ ނަންވެސް އެމެރިކާއިން ވަނީ އުވާލާފައެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ބުނީ، މި ނިންމުމަކީ ސޫރިޔާގެ އާ ސަރުކާރުން ބައިނަލްއަޤްވާމީ ޓެރަރިޒަމާ ދުރުހެލިވެ، އައި.އެސް އާއި އެހެނިހެން ހަތިޔާރުއެޅި ޖަމާޢަތްތަކާ ދެކޮޅަށް އަޅަމުންދާ ހަރުދަނާ ފިޔަވަޅުތަކުގެ އަގުވަޒަންކުރުމުގެ ގޮތުން ނިންމި ނިންމުމެއް ކަމަށެވެ.
މި ނިންމުމާއެކު ސޫރިޔާގެ އަމިއްލަ ސެކްޓަރަށް އިންވެސްޓްމަންޓްތައް ގެނައުމަށް އޮތް ހުރަސްތައް ނައްތާލެވި، އިޤްތިޞާދު އަލުން ކޮޅަށްޖެހުމަށް ބޮޑު ފުރުޞަތެއް ލިބިގެންދާނެ ކަމަށް ޚަބަރުދެއެވެ. ސޫރިޔާގެ ޚާރިޖީ ވަޒީރު އަސާދު އަލް-ޝައިބާނީ ވަނީ މި ނިންމުމަށް މަރުޙަބާ ކިޔައި، މިއީ ސޫރިޔާގެ ރައްޔިތުން ގެނައި ބަދަލުގެ ނަތީޖާ ކަމަށް ބުނެފައެވެ.
