ސަޢޫދީ ޢަރަބިއްޔާގެ ރިޔާޟްގައިވާ އަލް-ޙާއިރު ހައި-ސެކިއުރިޓީ ޖަލުގެ އެކަހެރި ގޮޅީގައި ބަންދުކޮށްފައިވާ މަޝްހޫރު ދީނި ޢިލްމުވެރިޔާ ޝައިޚް ޢަބްދުލްޢަޒީޒް އަލް-ޠަރީފީގެ މައްޗަށް އަދަބެއްގެ ގޮތުން މަރުގެ އަދަބު ދިނުމަށް ސަޢޫދީ ޕަބްލިކް ޕްރޮސެކިއުޝަނުން ކޯޓުގައި އެދިއްޖެއެވެ. ’ޕްރިޒަނާސް އޮފް ކޮންޝަންސް‘ އަދި ’އަލްޤިސްޠު‘ އިންސާނީ ޙައްޤުތަކާ ބެހޭ ޖަމާޢަތްތަކުން ކަށަވަރުކޮށްދީފައިވާ ގޮތުގައި، ޝައިޚް އަލް-ޠަރީފީ ހައްޔަރުކޮށްފައިވަނީ 2016 ވަނަ އަހަރުގެ އެޕްރީލް މަހުގެ ފަހުކޮޅު، ސަޢޫދީ ސަރުކާރުގެ ބާރުގެ ދަށުގައިވާ ’އަލް ޢަރަބިއްޔާ‘ ޗެނަލަށާއި ދައުލަތުގެ ބައެއް ދީނީ ސިޔާސަތުތަކަށް ސޯޝަލް މީޑިއާގައި ފާޑުވިދާޅުވުމާ ގުޅިގެންނެވެ.
އިންޞާފުވެރި ޝަރީޢަތަކާ ނުލައި 10 އަހަރާ ގާތަށް ޖަލުގައި ބަންދުކޮށްފައިވާ ޝައިޚް އަލް-ޠަރީފީއަށް އާއިލީ ބައްދަލުވުންތަކާއި ޤާނޫނީ ވަކީލުންގެ އެހީތެރިކަން ވަނީ މަޙްރޫމްކޮށްފައެވެ. އިންސާނީ ޙައްޤުތަކަށް ވަކާލާތުކުރާ ޖަމާޢަތްތަކުން ފާހަގަކުރާ ގޮތުގައި، އަދާ ހަމައަށް ސަޢޫދީ ސަރުކާރާ ޚިލާފު ޚިޔާލު ފާޅުކުރާ 30,000 އަށްވުރެ ގިނަ ޢާލިމުންނާއި، ދާއީންނާއި ދީނީ ދަރިވަރުން ވަނީ ޖަލަށް ލާފައެވެ. މީގެ ތެރޭގައި މި ޖީލުތަކުގެ އެންމެ ބޮޑެތި މުޙައްދިޘުން ހިމެނެއެވެ. އޭގެ ތެރޭގައި ޝައިޚް ނާޞިރު އަލްފަހުދު، ޝައިޚް ސުލައިމާން އަލްއަލްވާން، ޝައިޚް ޢަލީއަލްޚުޟައިރު ފަދަ ބޭފުޅުން ހިމެނިވަޑައިގަންނަވައެވެ.
މިބޭފުޅުންގެ ތެރެއިން ވަރަށް ގިނަ ބޭފުޅުންގެ ޙުކުމްތައް ނިމި އަނެއްކާ އަލުން ބަންދުކޮށް، އިންސާފުވެރި ޝަރީޢަތަކާނުލާ ސަޢޫދީ ރަސްކަމުން އިތުރު ޙުކުމްތައް ކުރުމުގެ ސަބަބުން 20 އަހަރަށްވުރެ ގިނަ ދުވަހު ޖަލުގައި ތިއްބެވި ބޭފުޅުން ހިމެނިވަޑައިގަންނަވައެވެ. ސަޢޫދީ ޖަލުތަކުގައި ދެމުންދާ އަނިޔާތަކާއި، ސިއްޙީ އެހީތެރިކަން ނުދިނުމުގެ ސަބަބުން ގިނަ ޢިލްމުވެރީންތަކެއް ޖަލުގައި ނިޔާވެފައިވާ ކަމަށްވެސް އިންސާނީ ޙައްޤުތަކަށް ވަކާލާތުކުރާ ޖަމާޢަތްތަކުން ރިޕޯޓުކުރެއެވެ.
