މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ދަތުރުފަތުރާ ބެހޭ ބިލު މަޖިލީހުން މިއަދު ފާސްކޮށްފިއެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ކުރެންދޫ ދާއިރާގެ މެންބަރު މުޙައްމަދު ޝާމިން ޙަބީބެވެ. ކޮމިޓީން ގެނައި އިސްލާހުތަކާއެކު މަޖިލީހުން މި ބިލު ފާސްކޮށްފައިވަނީ 47 މެންބަރުންގެ ވޯޓާއެކުގައެވެ.
މި ބިލު ހުށަހެޅި މައިގަނޑު ސަބަބެއް ކަމަށް ބަޔާންކޮށްފައިވަނީ، ރާއްޖޭގައި އެއްގަމު އުޅަނދު ދުއްވާ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމަށާއި، އެއްގަމު ދަތުރުފަތުރާ ގުޅޭ އެންމެހައި ކަންކަން ހަރުދަނާ ގާނޫނީ އޮނިގަނޑެއްގެ ދަށުން ޒަމާނާ އެކަށޭނަ ގޮތެއްގެ މަތިން ރާވައި ހިންގުމަށްޓަކައި ރާއްޖޭގައި އެއްގަމު ދަތުރުފަތުރާ ގުޅޭ ގާނޫނީ އޮނިގަނޑެއް ކަނޑައެޅުން ކަމަށެވެ.
މި ބިލުގައި ބަޔާންކޮށްފައިވާ ގޮތުން. އެއްގަމު ދަތުރުފަތުރުގެ ނިޒާމު ހަރަދަނާ ގޮތެއްގައި ހިންގުމަށް މަގުފަހިކުރުމަށް، ދަތުރުފަތުރުގެ ގައުމީ ސްޓްރެޓެޖީއެއް އެކުލަވާލަން ޖެހޭނެއެވެ. އަދި މި ނިޒާމު ހިންގުމުގެ މައިގަނޑު މަސްއޫލިއްޔަތުތައް އަދާކުރަން ޖެހޭނީ، ދަތުރުފަތުރާ ގުޅުންހުރި މިނިސްޓްރީއަކުން ކަމަށާއި އެ މިނިސްޓްރީއަށް ލަފާދިނުމަށް ރޯޑް ސޭފްޓީ އެންޑް ޓްރެފިކް މެނޭޖްމަންޓް އެޑްވައިޒަރީ ކޮމިޓީއެއް އެކުލަވާލަން ޖެހޭނެ ކަމަށްވެސް ބަޔާންކޮށްފައިވެއެވެ.
ރާއްޖޭން ބޭރުގައި އުޅަނދު ދުއްވުމަށް އިންޓަރނޭޝަނަލް ޑްރައިވިން ޕާމިޓެއް ދޫކުރަންވާނެ ކަމަށާއި، ޓްރެފިކާ ބެހޭ ބައިނަލްއަގުވާމީ މުއާހަދާގައި ބައިވެރިވެފައިވާ އެހެން ގައުމެއްގެ ސައްހަ ލައިންސަންސަކާއެކު ރާއްޖޭގައި އިތުރު ލައިސަންސެއް ނުނަގައި އުޅަނދު ދުއްވޭނެ ކަމަށްވެސް ބިލުގައި ހިމަނާފައިވެއެވެ. ނަމަވެސް އެއްވެސް ގާނޫނަކާ ނުވަތަ ގަވާއިދަކާ ހިލާފު އަމަލެއް ކޮށްފިނަމަ، ލައިސަންސް ހިފެހެއްޓޭނެއެވެ. ދައްކަންޖެހޭ ޖޫރިމަނާ ފައިސާގެ އަދަދު 5،000 ނުވަތަ އެއަށްވުރެ ބޮޑުވެއްޖެނަމަވެސް ލައިސަންސް ހިފެހެއްޓޭނެ ކަމަށް ބިލުގައި ފާހަގަކޮށްފައިވެއެވެ.
މި ބިލާއެކު މާލެ ސަރަހައްދުގެ އެއްގަމު ދަތުރުފަތުރުގެ ނިޒާމާ ގުޅޭ ކަންކަން ރާވައި ހިންގުމަށް ގްރޭޓަރ މާލެ ޓްރާންސްޕޯޓް އެންޑް މޮބިލިޓީ އޮފީހެއް ވެސް މިހާރު ވަނީ އުފައްދައިފައެވެ.
