ތަރައްގީގެ މަޝްރޫއުތަކަށް ކައުންސިލްގެ އިހްތިސާސްގެ ދަށުގައި ހުންނަ ބިންތައް ސަރުކާރަށް ނެގޭ ގޮތަށް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ހުށަހަޅާފައިވާ އިސްލާހު ރައްޔިތުންގެ މަޖިލީހުން މިއަދު ފާސްކޮށްފިއެވެ.
ކައުންސިލްގެ އިހުތިސާސްގެ ދަށުގައިވާ ބިންތައް ސަރުކާރަށް ނެގޭ ގޮތަށް ލާމަރުކަޒީ ގާނޫނަށް އިސްލާހު ހުށަހެޅުއްވީ، ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ޢަބްދުލް ހަންނާން އަބޫބަކުރެވެ.
މި ބިލުގެ މައިގަނޑު މަގްސަދެއްކަމަށް ބުނެފައިވަނީ، ސަރުކާރުން ކުރިއަށްގެންދާ ތަރައްގީގެ މަޝްރޫއުތައް ހަލުވިކަމާއެކު ކުރިއަށްގެންދިއުމަށްޓަކައި ކައުންސިލްތަކުގެ އެއްބާރުލުން ގާނޫނީ އޮނިގަނޑެއްގެ ތެރެއިން ކަށަަވަރުކުރުމާއި، ސަރުކާރުން ކުރިއަށްގެންދާ މަޝްރޫއުތަކަށް ބޭނުންވާ ބިންތަކާއި ގުޅޭ އިޖުރާއުތައް ހަރުދަނާކުރުން ކަމަށެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި މި އިސްލާހު ފާސްކުރުމަށް ފެންނަ ކަމަށް 47 މެންބަރުން ވޯޓުދެއްވާފައިވާއިރު، މި އިސްލާހު ފާސްކުރުމާ ދެކޮޅަށް ވޯޓުދެއްވީ 12 މެންބަރުންނެވެ.
މި އިސްލާހުގައި ބަޔާންކޮށްފައިވާ ގޮތުގައި، ކައުންސިލްގެ އިހުތިސާސްގެ ދަށުގައި ހިމެނޭ ބިމެއްގައި ސަރުކާރުންގެ މަޝްރޫއެއް ހިންގުމަށްޓަކައި އެ ބިމެއް ކައުންސިލްގެ އިހުތިސާސުން ވަކިކުރުމުގެ ބާރު ވަޒީރުންގެ މަޖިލީހަށް ލިބިދީފައިވެއެވެ. މިފަދަ ނިންމުމެއް ނިންމައި ކަމާބެހޭ ގައުމީ އިދާރާއިން ކައުންސިލަށް އެންގުމާއެކު، އެ ބިމެއް ކައުންސިލްގެ އިހުތިސާސުން ވަކިވެ، ދައުލަތުގެ ފުރިހަމަ ބާރު ހިނގާ ތަނަކަށް ބަދަލުވާނެއެވެ.
ހަމައެހެންމެ، ސަރުކާރުތަކުން ކުރިއަށްގެންދާ މަޝްރޫއުތަކަށް ހުރަސްއެޅުން ހުއްޓުވުމަށްޓަކައި ވެސް މި އިސްލާހުގައި މާއްދާއެއް ހިމަނާފައިވާކަން ފާހަގަކޮށްލެވެއެވެ. އެގޮތުން އެއްވެސް ސަބަބަކާ ނުލައި ސަރުކާރު ކުރިއަށްގެންދާ މަޝްރޫއުތަކަށް ހުރަސްއެޅޭ ފަދަ ނިންމުންތައް ނިންމުމަކީ ކައުންސިލްތަކަށް މަނާކަމެއްގެ ގޮތުގައި ވަނީ ކަނޑައަޅައިފައެވެ. އަދި ކައުންސިލްތަކުގެ އިހުތިސާސުން ވަކިކުރެވޭ ބިންބިމުގައި ގާނޫނު ހުއްދަކުރާ ގޮތުގެ މަތިން ކައުންސިލުން ނުވަތަ ތިންވަނަ ފަރާތަކުން އިންވެސްޓްމަންޓެއް ކޮށްފައިވާނަމަ، އެފަދަ އިންވެސްޓްމަންޓްތަކަށް ފިނޭންސް މިނިސްޓްރީން ކައުންސިލުތަކަށް ނުވަތަ ތިންވަނަ ފަރާތްތަކަށް އެކަށީގެންވާ ބަދަލެއް ދޭންޖެހޭނެ ކަމަށްވެސް އިސްލާހުގައި ބަޔާންކޮށްފައިވެއެވެ.
