ލޯކަލް ގަވަރމަންޓް އޮތޯރިޓީ (އެލްޖީއޭ) ގެ ބޯޑަށް އައްޔަންކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ނަން ހުށަހެޅުއްވި ދެ ބޭފުޅުންނަށް މަޖިލީހުން މިއަދު ރުހުން ދީފިއެވެ.
އެލްޖީއޭގެ ބޯޑަށް އައްޔަންކުރުމަށް ރައީސް މުޢިއްޒު މަޖިލީހަށް ހުށަހެޅުއްވި ދެ ނަމަކީ ގދ. ގައްދޫ / ތިބުރޯޒުގެ، ޢާއިޝަތު އަރީފާ އާއި ށ. ކަނޑިތީމު / ރަތްވިލާގެ، މުޙައްމަދު އާރިފްގެ ނަމެވެ. މި ދެ ބޭފުޅުންގެ ނަން ރައްޔިތުންގެ މަޖިލީހަށް ފޮނުއްވާފައިވަނީ މި ހިނގާ އޮގަސްޓް މަހުގެ 10 ވަނަ ދުވަހުއެވެ.
އެގޮތުން އަރީފާ އައްޔަންކުރެއްވުމަށް ނިންމަވާފައިވަނީ މިންތީގެ ހަމަހަމަކަމުގެ ދާއިރާއިންނެވެ. ގަވަރނަންސް ނުވަތަ ޕަބްލިކް އެޑްމިނިސްޓްރޭޝަންގެ ދާއިރާއިން އައްޔަންކުރެއްވުމަށް ނިންމަވާފައިވަނީ އާރިފްއެވެ.
މި ދެ ބޭފުޅުންނަށް ރުހުން ހޯދުމަށް ނެގުނު ވޯޓުގައި މުޙައްމަދު އާރިފް އެލްޖީއޭގެ ބޯޑަށް އައްޔަންކުރުމަށް ފެނިވަޑައިގަންނަވާ ކަމަށް ޖަލްސާގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްކުރިއިރު، އެ އޮތޯރިޓީގެ ބޯޑަށް ޢާއިޝަތު އަރީފާ އައްޔަންކުރުމަށް ފެންނަ ކަމަށް ވޯޓު ދެއްވީ 48 މެންބަރުންނެވެ.
ޖުމްލަ 9 މެންބަރުންގެ މައްޗަށް އެކުލެވިގެންވާ އެލްޖީއޭގެ ބޯޑުގައި ތިއްބަވަނީ ގާނޫނުއަސާސީގެ 140 ވަނަ މާއްދާގައި ބަޔާންކޮށްފައިވާ ބޭނުމަށް ރައްޔިތުންގެ މަޖިލީހަށް ޖަވާބުދާރީވުމަށްޓަކައި ރައީސުލްޖުމްހޫރިއްޔާ އައްޔަންކުރައްވާ މިނިސްޓަރެއްގެ އިތުރުން، ޖެންޑަރ އިކުއަލިޓީގެ ދާއިރާއިން ތަޖުރިބާ ލިބިފައިވާ އަންހެން މެންބަރަކާއި، ގަވަރނަންސް ނުވަތަ ޕަބްލިކް އެޑްމިނިސްޓްރޭޝަންގެ ތަޖުރިބާ ލިބިފައިވާ މެންބަރަކާއި، މަދަނީ ޖަމުއިއްޔާތަކުގެ މެންބަރެކެވެ.
އަދި ހަމައެހެންމެ ސިޓީ ކައުންސިލަރުންގެ ތެރެއިން އިންތިހާބުކުރާ މެންބަރަކާއި، އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ ރައީސުންގެ ތެރެއިން އިންތިހާބުކުރާ މެންބަރަކާއި، ރަށު ކައުންސިލްތަކުގެ ތެރެއިން އިންތިހާބުކުރާ މެންބަރަކާއި، ފިނޭންސް މިނިސްޓްރީން ސީދާ މިނިސްޓަރު ކަނޑައަޅުއްވާ އެ އިދާރާގެ މުވައްޒަފެއްގެ އިތުރުން، ރައީސުލްޖުމްހޫރިއްޔާ ކަނޑައަޅުއްވާ އެ އޮތޯރިޓީގެ ޗީފް އެގްޒެކެޓިވް އޮފިސަރ (ސީއީއޯ) ވެސް މި ބޯޑުގައި ހިމެނި ވަޑައިގަންނަވައެވެ.
