ރާއްޖޭގައި ވަޒީފާ އަދާކުރާ ބިދޭސީ މުވައްޒަފުންގެ މުސާރަ، އެމްއެމްއޭގައި ރަޖިސްޓްރީ ކޮށްފައިވާ ބޭންކެއްގައި ހުޅުވާފައިވާ އަމިއްލަ އެކައުންޓަށް ޖަމާކުރަންޖެހޭ ގޮތަށް ގަވާއިދު އިސްލާހުކޮށްފިއެވެ.
މިގޮތަށް އިސްލާހުކޮށްފައިވަނީ ބިދޭސީން ވަޒީފާ އަދާކުރުމާ ބެހޭ ގަވާއިދަށް ގެނައި ތިންވަނަ އިސްލާހުގައެވެ. މި ގަވާއިދަށް އިސްލާހު ގެނެސް، ގެޒެޓުކޮށްފައިވަނީ މިއަދެވެ. އެ އިސްލާހުގައި ބަޔާންކޮށްފައިވާ ގޮތުގައި، ރާއްޖޭގައި ވަޒީފާ އަދާކުރާ ބިދޭސީ މުވައްޒަފުންނަށް ވަޒީފާގެ އެއްބަސްވުމުގެ ދަށުން، ދޭންޖެހޭ މުސާރަ ޖަމާކުރަންވާނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގައި ރަޖިސްޓްރީ ކޮށްފައިވާ ނުވަތަ އެ އޮތޯރިޓީން ހުއްދަ ދީފައިވާ ބެންކެއްގައި އެ މުވައްޒަފެއްގެ ނަމުގައި ހުޅުވާފައިވާ ބޭންކް އެކައުންޓަކަށް ކަމަށެވެ.
މި އިސްލާހަށް އަމަލުކުރަން ފަށާނީ ދިވެހި ސަރުކާރުގެ ގެޒެޓުގައި މި ގަވާއިދު ޝާއިއުކުރާ ދުވަހުން ފެށިގެން 30 ދުވަސް ފަހުންނެވެ.
ރާއްޖޭގައި ވަޒީފާ އަދާކުރާ ބިދޭސީ މުވައްޒަފުންގެ މުސާރަ، އެމްއެމްއޭގައި ރަޖިސްޓްރީކޮށްފައިވާ ބޭންކެއްގައި ހުޅުވާފައިވާ އަމިއްލަ އެކައުންޓަށް ޖަމާކުރަންޖެހޭ ގޮތަށް ގަވާއިދު އިސްލާހުކޮށްފައި މިވަނީ، ގިނަ އަދަދެއްގެ ބިދޭސީން ގަވާއިދަށް ފެއްތުމަށް ކުރަމުން އަންނަ މަސައްކަތްތަކުގެ ދަށުން ކަމަށް ކަމާބެހޭ އިދާރާތަކުން ވަނީ ހާމަކޮށްފައެވެ.
މީގެ އިތުރުން، ވަޒީފާ އަދާކުރާ ބިދޭސީންގެ ތެރެއިން ބައެއް ފަރާތްތަކަށް ޑޮލަރުން އަދި އަނެއްބައި ފަރާތްތަކަށް ދިވެހި ރުފިޔާއިން މުސާރަ ލިބޭއިރު، މުސާރައިގެ ގޮތުގައި ލިބޭ ޑޮލަރު ކަޅު ބާޒާރުގައި ވިއްކުމާއި، ދިވެހި ރުފިޔާއިން މުސާރަ ލިބޭ މީހުން ބޮޑު އަގުގައި ޑޮލަރު ގަންނަ މައްސަލަތައް ފާހަގަކުރެވޭ ކަމަށް ވެސް އެ އިދާރާތަކުން ފާހަގަކުރެއެވެ.
ރާއްޖޭގައި ވަޒީފާ އަދާކުރަމުންދާ ބިދޭސީ މަސައްކަތްތެރިން ގަވާއިދުގެ ތެރެއަށް ވައްދާ، އެ ފަރާތްތަކުގެ ހައްގުތައް ރައްކާތެރިކުރުމަށް މި ސަރުކާރުން ގިނަ މަސައްކަތްތަކެއް ކުރަމުން އަންނަކަން ފާހަގަކޮށްލެވެއެވެ.
ހަމައެކަނި މުސާރަ އެއް ނޫން. ހުރިހާ އެލަވަންސަކާއި ޢިނާޔަތެއްވެސް ހިމަނާ. މައްސަލަ ހައްލުކުރަން ބޭނުންނަމަ، އެ މައްސަލައިގެ ވަށައިގެންވާ ހުރިހާ ލޯވަޅުތަކެއް ބައްދަން ޖެހޭނެ.