ފުލުހުންނާ މާރާމާރީ ހިންގި މީހެއްގެ ބަންދަށް 20 ދުވަސް ޖަހައިފިއެވެ.
ކްރިމިނަލް ކޯޓުން ކޮށްފައިވާ އަމުރުގައިވާ ގޮތުން މި މައްސަލައިގައި ހައްޔަރުކޮށްފައިވަނީ އުމުރުން 30 އަހަރުގެ ފިރިހެނެކެވެ. އޭނާގެ މައްޗަށް ކުރަނީ ގާނޫނު ތަންފީޒުކުރުމަށް ހުރަސް އެޅުމާއި، ޖެހުމާއި އަދި ބިރުދެއްކުމުގެ ތުހުމަތެވެ. އޭނާގެ ބަންދުގެ މުއްދަތު ޖެހުމަށް މިއަދު ކޯޓަށް ހާޒިރުކުރުމުން ކަސްޓޯޑިއަލް ޖަލެއްގައި 20 ދުވަހަށް ބަންދުކުރުމަށް އެ ކޯޓުން ވަނީ އަމުރުކޮށްފައެވެ.
ކޯޓު އަމުރުގައި ވަނީ އޭނާގެ މައްޗަށް ތުހުމަތުކޮށްފައިވާ ކުށް އޭނާ ކުރިކަމަށް ތުހުމަތުކުރެވޭ މިންވަރެއްގެ ހެކިލިބިފައިވާ ކަމަށެވެ. އެގޮތުން އަނިޔާ ލިބުނު ފުލުހުންގެ ބަޔާންތަކާއި ކުށުގެ ވެއްޓަށް ދިޔަ ފުލުހުންނަށް ލިބުނު އަނިޔާތަކުގެ ފޮޓޯ ހިމެނޭ ފޮޓޯ ރިޕޯޓާއި އަނިޔާ ލިބުނު ފުލުހުންގެ މެޑިކަލް ރިޕޯޓުތައް ހުށަހަޅާފައިވާ ކަމަށެވެ.
ކޯޓުގެ ތަފްސީލީ ބަޔާނުގައި ވަނީ، އޭނާ އިތުރު ބަޔަކާއެކު ފުލުހުންނާމެދު މާރާމާރީ ހިންގި ކަމަށް ފުލުހުން ފާހަގަކޮށްފައިވާ ކަމަށާއި، އަދި އޭނާ ވަނީ ތުހުމަތުތަކަށް އިންކާރުކޮށްފައިކަމަށާ،އި ޝަރުތުތަކާއިއެކު ބަންދުން ދޫކޮށްދިނުމަށް އެދިފައިވާ ކަމަށެވެ.
މީގެއިތުރުން އެ މީހާއަކީ ހައްޔަރާއި ބަންދުގެ ރިކޯޑް އޮތް މީހެއް ކަމަށް ވެސް ކޯޓުން ފާހަގަކޮށްފައިވެއެވެ.
