އިރާޤުގައި ހަރަކާތްތެރިވާ ހަތިޔާރުއެޅި ޖަމާޢަތްތަކުން ގެންގުޅޭ ހަތިޔާރުތައް ދައުލަތުގެ ސެކިއުރިޓީ އިދާރާތަކުގެ ދަށަށް ބަދަލުކުރުމުގެ މަސައްކަތް ސެޕްޓެމްބަރު 30 ގެ ފަހުން ކުރިއަށްދާނެކަމަށާއި، ހަނގުރާމަ އާއި ސުލްޙައިގެ އެންމެހައި ނިންމުންތައް ނިންމުމުގެ ފުރިހަމަ ބާރު އޮންނާނީ ހަމައެކަނި ދައުލަތުގެ މަރުކަޒީ ސަރުކާރަށް ކަމަށް އިރާޤުގެ ނޭޝަނަލް ސެކިއުރިޓީ އެޑްވައިޒަރު ޤާސިމް އަލް-އަޢުރަޖީ ބުނެފިއެވެ.
މި ނިންމުމާއެކު ފެންނަމުންދަނީ ބައިނަލްއަޤްވާމީ ސިޔާސީ މަސްރަހުގެ ހިތި ޙަޤީގަތެވެ. އިސްލާމިކް ސްޓޭޓް (އައި.އެސް) ބަލިކުރުމަށްޓަކައި އެމެރިކާއިން އީރާނާއި އެޤައުމަށް ވަފާތެރި ޝީޢީ ހަނގުރާމަވެރި ޖަމާޢަތްތަކުގެ އެހީތެރިކަން ހޯދައި، އެ ފަރާތްތަކުގެ ބޭނުން ހިފިއެވެ. ނަމަވެސް، މަޤްޞަދު ޙާޞިލުވެ، އައި.އެސްގެ ނުރައްކާ ކުޑަވުމުން، އެމެރިކާގެ މަޞްލަޙަތު އިސްކޮށް، އެ ބާރުތައް އެކަހެރިކޮށް، ދޫކޮށްލުމަކީ އެމެރިކާގެ އިއްތިހާދީ ސިޔާސަތުން ލިބިދޭ ބޮޑު ފިލާވަޅެކެވެ. ބޭނުން ކެނޑުމުން ’އެކުވެރިން‘ އުކާލުމަކީ އެމެރިކާގެ ޚާރިޖީ ސިޔާސަތުގެ ޙަޤީޤީ ސޫރައެވެ. މިހާރު މިވަނީ އެ ޖަމާޢަތްތަކުގެ ހަތިޔާރު އަތުލައި، އެތަނުގައި ތިބި ބޭރުގެ ހަނގުރާމަވެރިން އެމީހުންގެ ޤައުމުތަކަށް ފޮނުވާލުމަށް މަޖުބޫރުކޮށްފައެވެ.
ޢިރާޤުގެ ދައުލަތުގެ ޓީވީ (އަލްޢިރާޤިއްޔާ) އަށް ދިން އިންޓަވިއުއެއްގައި އަޢުރަޖީ ބުނީ، ސެޕްޓެމްބަރު 30 އަކީ އެމެރިކާ އިސްވެ ހެދި ބައިނަލްއަޤްވާމީ އިއްތިހާދުގެ ސިފައިން އިރާޤުން އެކީއެކުން ފައިބައި ނިންމަންޖެހޭ ސުންގަޑި ކަމަށެވެ. އަދި އެއަށްފަހު، ޕޮޕިއުލަރ މޮބިލައިޒޭޝަން ފޯސަސް (ޕީ.އެމް.އެފް) ގެ ތެރޭގައި ހިމެނޭ ޝީޢީ ޖަމާޢަތްތަކުގެ ހަތިޔާރުތައް މަޑުމަޑުން ދައުލަތުގެ ކޮންޓްރޯލްގެ ދަށަށް ގެނައުމުގެ ޢަމަލީ މަސައްކަތާއި މަޝްވަރާތައް ފެށިގެންދާނެ ކަމަށް އޭނާ ފާހަގަކުރިއެވެ.
”ސެޕްޓެމްބަރު 30 އަކީ ބައިނަލްއަޤްވާމީ އިއްތިހާދުގެ ލަޝްކަރުތައް މިޤައުމުން ފައިބަންޖެހޭ ތާރީޚު. ހަތިޔާރުތައް ދައުލަތުގެ ބާރުގެ ދަށަށް ގެނައުމުގެ މަސައްކަތް ކުރިއަށްދާނީ އެއްވެސް ކުރިމަތިލުމަކަށް ނުގޮސް،ސުލްޙަވެރިކަމާއެކު ދެފަރާތުގެ މެދުގައި ވެވޭ އެމްއޯޔޫތަކުގެ ތެރެއިން،“ އަޢުރަޖީ ބުނިއެވެ.
