ދިވެހިރާއްޖޭގައި މިހާތަނަށް ބިނާކުރާ އެންމެ ބޮޑު ވަގުފު އިމާރާތް ކަމުގައިވާ ”ދާރުއްސަލާމް“ ގެ އަމަލީ މަސައްކަތް ރަސްމީކޮށް ފަށައިފިއެވެ.
ރާއްޖޭގައި އިސްލާމީ ދާއިރާ އިތުރަށް ހަރުދަނާކޮށް ފުޅާކުރުމަށްޓަކައި ސަރުކާރުން އަންނަނީ ގިނަ މަޝްރޫއުތަކެއް ކުރިއަށްގެންދަމުންނެވެ. މީގެ ތެރެއިން އެންމެ ފާހަގަކޮށްލެވޭ އެއް މަޝްރޫއަކީ ވަގުފު ފަންޑު އިތުރަށް ތަރައްގީކޮށް، އިސްލާމީ ކަންކަމަށް ދެމެހެއްޓެނިވި ގޮތެއްގައި މާލީ މަންފާ ހޯދުމުގެ މަގުސަދުގައި ބިނާކުރާ ”ދާރުއްސަލާމް“ މަޝްރޫއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދުފުޅާ އެއްގޮތަށް ކުރިއަށްގެންދާ މި މަޝްރޫއަކީ 244 މިލިއަން ރުފިޔާ ހަރަދުކޮށްގެން 24 މަސްދުވަހުގެ ތެރޭގައި ނިންމުމަށް ކަނޑައަޅާފައިވާ މަޝްރޫއެކެވެ.
މި މަޝްރޫއުގެ އަމަލީ މަސައްކަތް ސަރުކާރުން ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) އާއެވެ. މި އިމާރާތް ބިނާކުރުމަށް ހަމަޖެހިފައިވަނީ ހުޅުމާލޭ އަމީން އެވެނިއު ޓަވަރުތަކާ ކުރިމަތީގައި އޮންނަ ބިމުގައެވެ. ޒަމާނީ ފެންވަރުގެ ވަސީލަތްތަކާއެކު 12 ފަންގިފިލާއަށް ބިނާކުރާ މި އިމާރާތުގައި ޕާކިންގގެ ހާއްސަ ސަރަހައްދަކާއި، ގްރައުންޑް ފްލޯގައި ފުރިހަމަ ރިސެޕްޝަނެއްގެ އިތުރުން ޕާކުކުރުމަށް ބޭނުންވާ އެންމެހައި ވަސީލަތްތައް ގާއިމުކުރެވިގެންދާނެއެވެ.
މީގެއިތުރުން، މި އިމާރާތުގައި ޒަމާނީ ކޮންފަރެންސް ހޯލަކާއި، އޮފީސް ޖާގަތަކާއި، ބައްދަލުވުންތައް ބާއްވާ ކޮޓަރިތަކުގެ އިތުރުން ނަމާދުކުރާނެ ހާއްސަ ތަނެއް ހިމެނެއެވެ. އަދި ކުޑަކުދިން ބަލަހައްޓާ ޑޭ-ކެއަރ ސެންޓަރެއްވެސް ގާއިމުކުރުމަށް ހަމަޖެހިފައިވާއިރު، ލިފްޓުގެ ހިދުމަތާއެކު ހާއްސަ އެހީއަށް ބޭނުންވާ ފަރާތްތަކަށް ފަސޭހައިން ވަދެނިކުމެ އުޅެވޭނެ އެންމެހައި އިންތިޒާމުތައް ހަމަޖެހިގެންދާނެއެވެ. މި އިމާރާތުގެ އެންމެ މަތީ ފަންގިފިލާ ފަރުމާކުރެވިފައިވަނީ ހާމަ ޓެރަހެއްގެ ގޮތުގައެވެ.
މަޝްރޫއުގެ މަސައްކަތް ނިމުމަށްފަހު، ކުރިއަށްއޮތް 5 އަހަރު ދުވަހުގެ މުއްދަތަށް އިމާރާތް ބެލެހެއްޓުމާއި މަރާމާތުކުރުމުގެ މަސައްކަތް ކުރިއަށްގެންދާނީ އާރްސީސީގެ ފަރާތުންނެވެ. ބޭންކް އޮފް މޯލްޑިވްސްގެ އިސްލާމިކް ފައިނޭންސިންގ މެދުވެރިކޮށް ކުރިއަށްގެންދާ މި މަޝްރޫއު ފުރިހަމަވުމާއެކު، އިސްލާމީ ދާއިރާއަށް މާލީގޮތުން ބޮޑެތި ކުރިއެރުންތަކެއް ލިބިގެންދާނެ ކަމަށް އިސްލާމީ ކަންތައްތަކާ ބެހޭ ވުޒާރާއިން ފާހަގަކުރައްވައެވެ. އެގޮތުން، މި އިމާރާތުން އަހަރަކު ގާތްގަނޑަކަށް 60 މިލިއަން ރުފިޔާގެ އާމްދަނީއެއް ލިބޭނެ ކަމަށް އަންދާޒާކުރެވޭއިރު، އާމްދަނީގެ 20 އިންސައްތަ މޯލްޑިވްސް ޒަކާތު ހައުސްއަށް އަދި ބާކީ 80 އިންސައްތަ ހާއްސަކުރެވިގެންދާނީ އިސްލާމިކް ވަގުފު ފަންޑަށެވެ.
މި މަޝްރޫއާ ގުޅޭގޮތުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ތާރީހި އިސްނެންގެވުމަކީ، ވަގުފުގެ ނިޒާމު މިހާރަށްވުރެ އިތުރަށް ހަރުދަނާކޮށް، މިސްކިތްތައް ބިނާކުރުމާއި ބެލެހެއްޓުން ހިމެނޭހެން އިސްލާމީ އެކި ކަންކަމަށް ދެމެހެއްޓެނިވި ގޮތެއްގައި އާމްދަނީ ހޯދައިދިނުމަށް އެމަނިކުފާނު ގެންގުޅުއްވާ ހަރުދަނާ ތަސައްވުރެއް ކަމަށެވެ.
