ރަސްމާލެ ހިއްކުމުގެ މަޝްރޫއުގެ ދަށުން މިހާރު 716 ހެކްޓަރު ހިއްކައި، ރާއްޖޭގެ އެންމެ ބިން ބޮޑު ރަށަކަށް ރަސްމާލެ ވެއްޖެ އެވެ.
ހައުސިން މިނިސްޓްރީގެ ޑެޕިއުޓީ މިނިސްޓަރު މުހައްމަދު ނާޝިދު އެކްސްގައި ކުރެއްވި ވިދާޅުވީ، ރާއްޖޭގެ ތާރީހުގައި ހިންގާ ބިންހިއްކުމުގެ އެންމެ ބިޔަ މަޝްރޫއު ކަމަށްވާ ރަސްމާލެ ހިއްކުމުގެ މަސައްކަތް ހުއްޓުމެއްނެތި ކުރިޔަށް ދާ ކަމަށެވެ. އެގޮތުން ޖުމްލަ ހިއްކަން ޖެހޭ 1،150 ހެކްޓަރުގެ ތެރެއިން މިހާތަނަށް 716 ހެކްޓަރު ހިއްކައި، ރަސްމާލެ ރާއްޖޭގެ އެންމެ ބިން ބޮޑު ރަށަށް ވެފައިވާ ކަމަށެވެ.
”މިއީ މީގެ ކުރިން އެންމެ ބޮޑު ރަށުގެ ގޮތުގައި އޮތް ލ. ގަމަށް (609 ހެކްޓަރު) ވުރެ 107 ހެކްޓަރު ބޮޑު މިންވަރެއް.“ ނާޝިދުގެ ޕޯސްޓުގައި ވިދާޅުވިއެވެ.
މި ސަރުކާރުގެ ”ބޯހިޔާވަހިކަން އެންމެންނަށް“ ސިޔާސަތުގެ ދަށުން އެކުލަވާލާފައިވާ ”އާއިލީ ބޯހިޔާވަހިކަން“ ޕްރޮގްރާމުގެ ފުރަތަމަ ފިޔަވަހީގައި، މާލޭގެ ރައްޔިތުންނަށް ރަސްމާލެއިން 15،000 ގޯތި ދޫކުރުމަށް ވަނީ ހަމަޖެހިފައެވެ. އަދި މި މަޝްރޫއު އެއްކޮށް ނިމިގެންދާއިރު، ޖުމްލަ 65،000 ގެދޮރުވެރިކަމުގެ ފުރުސަތު ރައްޔިތުންނަށް ކަށަވަރުވެގެންދާނެ ކަމަށް ސަރުކާރުން ބުނެއެވެ.
މީ ގެއިތުރުން، ރަސްމާލެ ތަރައްގީކުރުމުގެ މާސްޓަރ ޕްލޭން އެކުލަވާލުމަށްޓަކައި ބޭނުންވާ ކޮންސަލްޓެންސީ ހިދުމަތް ފޯރުކޮށްދޭނެ ފަރާތެއް ހޯދުމުގެ މަސައްކަތް ވެސް ހައުސިން މިނިސްޓްރީން މިހާރު އަންނަނީ ކުރަމުންނެވެ. މި މާސްޓާ ޕްލޭންގެ މައިގަނޑު އަމާޒަކީ ރަސްމާލެއަކީ ތިމާވެއްޓާ ރައްޓެހި، އަސާސީ ޔުޓިލިޓީ ހިދުމަތްތަކާއި ދަތުރުފަތުރުގެ ނިޒާމު ފުރިހަމައަށް ގާއިމުވެފައިވާ، އަދި ހާއްސަ އެހީއަށް ބޭނުންވާ ފަރާތްތަކަށް ވެސް ފަސޭހަކަމާއެކު ދިރިއުޅެވޭނެ (އެކްސެސިބަލް) ފުރިހަމަ ސިޓީއެއްގެ ގޮތުގައި ފަރުމާކުރުމެވެ.
ރަސްމާލެ މަޝްރޫއުގެ އަމަލީ މަސައްކަތް އެންމެ ފުރަތަމަ ފަށާފައިވަނީ 18 ޑިސެންބަރު 2023 ވަނަ ދުވަހުއެވެ. އަދި މަޝްރޫއުގެ ދުވެލި އިތުރަށް ހަލުވިކުރުމުގެ ގޮތުން، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ހަވާލުކޮށްގެން މަސައްކަތްތައް އަލުން ފަށާފައިވަނީ މިދިޔަ ޑިސެންބަރު މަހުގެ އެއްވަނަ ދުވަހުއެވެ.
