20 ވަނަ ރައްޔިތުންގެ މަޖިލީހުގެ އިންތިހާބީ މެންބަރުންނަށް މަޖިލީހުގެ މަސައްކަތްތައް ތައާރަފުކޮށްދިނުމުގެ ގޮތުން އިންޑަކްޝަން ޕްރޮގްރާމެއް މިއަދު ބާއްވައިފިއެވެ.
މަޖިލީހުގެ އެކްސް އެކައުންޓުން ވަނީ މިއަދު މަޖިލީހުގެ ތަޅުމުގައި އޮތް އެ ޕްރޮގްރާމްގެ ފޮޓޯ އަދި ވީޑިއޯ ޕޯސްޓްކޮށްފައެވެ.
20 ވަނަ ރައްޔިތުންގެ މަޖިލީހުގެ އިންތިޚާބީ މެންބަރުންނަށް ބޭއްވި އިންޑަކްޝަން ޕްރޮގްރާމްގެ ތެރެއިން
📷ފޮޓޯ އަލްބަމް: https://t.co/sLxREtnZ6z pic.twitter.com/X6COW0gKZN
— People's Majlis (@mvpeoplesmajlis) May 26, 2024
20 ވަނަ މަޖިލީހަކީ ސަރުކާރު ހިންގާ ޕާޓީ ޕީއެންސީގެ ސުޕަ މެޖޯރިޓީގެ މަޖިލީހެކެވެ. އެ މަޖިލީހުގައި ސަރުކާރުން ބޭނުންވާ ގޮތަކަށް ވޯޓު ދެއްވާ 79 މެންބަރުން ތިއްބަވާނެއެވެ. އެއީ ޕީއެންސީގެ 75 މެންބަރުންނާއި ސަރުކާރާ ގުޅިފައިވާ އެހެން ޕާޓީތަކުގެ ހަތަރު މެންބަރެކެވެ.
އެ މަޖިލީހުގައި ޖުމުލަ 93 މެންބަރުން ތިއްބަވާއިރު އިދިކޮޅު އެމްޑީޕީ ތަމްސީލްކުރައްވާނީ އެންމެ 12 މެންބަރުންނެވެ. އަދި އެއްވެސް ޕާޓީއަކަށް ނިސްބަތްނުވާ 2 މެންބަރަކު ތިއްބެވިއެވެ.
ވެރިކަންކުރާ ޕީއެންސީން މިހާރު ވަނީ އާ މަޖިލީހުގެ އިސް މަގާމުތަކާއި އެ ޕާޓީގެ ޕާލިމެންޓްރީ ގްރޫޕްގެ ލީޑާޝިޕަށް ވަޑައިގަންނަވާ މެންބަރުން ކަނޑައަޅުއްވާފައެވެ.
މަޖިލީހުގެ ރައީސް ކަމަށް އިންތިހާބުކުރަން ނިންމީ، ފޮނަދު ދާއިރާގެ އިންތިހާބީ މެންބަރު އަބްދުއްރަހީމް އަބްދުﷲ އެވެ. ނައިބު ރައީސަކަށް އިންތިހާބުކުރާނީ ދިއްގަރު ދާއިރާގެ އިންތިހާބީ މެންބަރު އަހުމަދު ނާޒިމެވެ.
