މިއަހަރުގެ މިހާތަނަށް ވައްކަމާ ގުޅުންހުރި 2،000 އަށްވުރެ ގިނަ މައްސަލަ ހުށަހަޅާފައިވާ ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.
ފުލުހުން އާންމުކޮށްފައިވާ އެންމެފަހުގެ ތަފާސްހިސާބުތައް ދައްކާގޮތުގައި، އަހަރުގެ މިހާތަނަށް ޖުމުލަ 8،131 މައްސަލައެއް ފުލުހުންނަށް ހުށަހަޅާފައިވެއެވެ. އޭގެ ތެރެއިން 2،226 މައްސަލައަކީ ވައްކަމުގެ މައްސަލަތައް ކަމަށްވާއިރު، މިއީ ހުށަހެޅިފައިވާ މައްސަލަތަކުގެ 27.4 އިންސައްތަ ކަމަށް ފުލުހުން ވަނީ ބުނެފައެވެ. މިދިޔަ 2025 ވަނަ އަހަރުގެ މިހާތަނަށް ފުލުހުންނަށް ހުށަހަޅާފައިވަނީ ވައްކަމާ ގުޅުންހުރި 2،193 މައްސަލައެވެ.
ވައްކަމާ ގުޅުންހުރި މައްސަލަތައް އެންމެ ގިނައިން ހުށަހަޅާފައިވަނީ މިއަހަރުގެ މެއި މަހުއެވެ. އެގޮތުން މެއި މަހުގެ ތެރޭގައި އެކަނިވެސް ވައްކަމާ ގުޅުންހުރި 339 މައްސަލައެއް ފުލުހުންނަށް ހުށަހަޅާފައިވެއެވެ.
ވައްކަމާ ގުޅުންހުރި މައްސަލަތަކަށްފަހު ދެން އެންމެ ގިނައިން ފުލުހުންނަށް ހުށަހަޅާފައިވަނީ މަގުމަތީގެ އެކްސިޑެންޓްތަކާއި މަސްތުވާތަކެތީގެ މައްސަލަތަކެވެ. އެގޮތުން މަގުމަތީގެ އެކްސިޑެންޓާ ގުޅުންހުރި 1,962 މައްސަލައެއް އަދި މަސްތުވާތަކެއްޗާ ގުޅުންހުރި 1,752 މައްސަލައެއް ފުލުހުންނަށް ހުށަހަޅާފައިވެއެވެ. މީގެ އިތުރުން ވެސް ފުލުހުންނަށް އެކި ކަންކަމާ ގުޅުންހުރި މައްސަލަތައް ހުށަހަޅާފައިވެއެވެ.
ފުލުހުންނަށް ހުށަހެޅިފައިވާ އިތުރު މައްސަލަތަކަކީ:
- ތަކެތި ގެއްލިގެން ހުށަހެޅި 661 މައްސަލަ
- އަނިޔާކުރުމާއި މާރާމާރީއާ ގުޅުންހުރި 424 މައްސަލަ
- ތަންތަނަށާއި މުދަލަށް ގެއްލުންދިނުމުގެ 415 މައްސަލަ
- ގެވެށި އަނިޔާގެ 212 މައްސަލަ
- ހިޔާނާތުގެ 171 މައްސަލަ
- ޖިންސީ ކުށުގެ 169 މައްސަލަ
- ފޭރުމުގެ 101 މައްސަލަ
- ފޯޖަރީ ނުވަތަ ކައުންޓަރފީޓްގެ 37 މައްސަލަ
ފުލުހުން އަންނަނީ ކުށް މަދުކުރެވިފައިވާ މާހައުލެއް އާންމުންނަށް ކަށަވަރުކުރުމަށް ހާއްސަ ފިޔަވަޅުތަކެއް އަޅައި، މާލެއާއި އަތޮޅުތެރޭގައި ތަފާތު އޮޕަރޭޝަންތައް ހިންގަމުންނެވެ.
