ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޓިކެޓުގައި ރައްޔިތުންގެ މަޖިލީހަށް އިންތިޚާބުވެވަޑައިގެންފައިވާ ހުޅުމާލެ އުތުރު ދާއިރާގެ މެންބަރު ހުސައިން ޝަރީފް، ސިޔާސީ މައިދާނުގައި ފަހަތަށް ފިޔަވަޅެއް އެޅުއްވުމަށް ވިސްނަވަމުން ގެންދަވާކަން ހާމަކުރައްވައިފިއެވެ.
ހުސައިން މިކަން ހާމަކުރައްވާފައިވަނީ އޭނާގެ ރަސްމީ ފޭސްބުކް އެކައުންޓުގައި ކުރެއްވި ޕޯސްޓެއްގައެވެ. އެ ޕޯސްޓުގައި އޭނާ ވިދާޅުވެފައިވަނީ ސިޔާސީ މަސްރަޙުގެ އޮއިވަރު ވަރަށް ގިނަ ގޮތްގޮތަށް ބަދަލުވަމުންދާ ކަމަށެވެ. އަދި މިފަދަ ހާލަތެއްގައި ކުރިއަށް ދިއުމަށްވުރެ، ފަހަތަށް ފިޔަވަޅެއް އެޅުން ބުއްދިވެރިކަމަށް ފެންނަ ކަމަށްވެސް އޭނާ ވަނީ ވިދާޅުވެފައެވެ.
ހުޅުމާލެ އުތުރު ދާއިރާގެ މެންބަރު ހުސައިން ޝަރީފަކީ ވެރިކަންކުރާ ޕާޓީގެ މެންބަރަކަށް ވީނަމަވެސް، ސަރުކާރުގެ ގިނަ ސިޔާސަތުތަކާއި ނިންމުންތަކާ ދެކޮޅަށް ސޯޝަލް މީޑިއާގައި ތަކުރާރުކޮށް ޚިޔާލުފާޅުކުރައްވަމުން ގެންދަވާ ބޭފުޅެކެވެ. އަދި ސަރުކާރުގެ ރަސްމީ ސްޓޭންޑާ ޚިލާފަށް އޭނާ ފާޅުކުރައްވާ މިފަދަ ޚިޔާލުތަކުގެ ސަބަބުން ޕީއެންސީ ތެރޭގައި އޮންނަނީ އޭނާއަށް އިތުބާރު ގެއްލިފައެވެ.
ސަރުކާރަށް ފާޑުވިދާޅުވަމުން، ހުސައިން ވިދާޅުވަނީ އޭނާގެ މައިގަނޑު އަމާޒަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ދެވަނަ ދައުރެއް ހޯއްދަވައިދެއްވުން ކަމަށެވެ.
މަޖިލިސް މެންބަރު ހުސައިން ޝަރީފް ސިޔާސީ ގޮތުން ފަހަތަށް ފިޔަވަޅެއް އަޅުއްވަން ނިންމެވި ނިންމެވުމުގެ ތަފްސީލެއް އަދި ހާމަކުރައްވާފައެއް ނުވެއެވެ. ނަމަވެސް، މި ޕޯސްޓާއެކު ސިޔާސީ ފަރާތްތަކުގެ މެދުގައި ވަނީ އެކި ގޮތްގޮތަށް ވާހަކަ ދެކެވެން ފަށާފައެވެ.
