ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުގެ ފަރާތުން ހުށަހަޅާފައިވާ އިސްލާހަކީ ކައުންސިލްތަކުގެ ބާރު ކަނޑާލުމަށް ގެންނަ އިސްލާހެއް ބުނެ އިދިކޮޅު އެމްޑީޕީން ދައްކަމުން އަންނަ ވާހަކަތަކަށް ރައްޔިތުންގެ މަޖިލީހުގެ އިނގުރައިދޫ ދާއިރާ ތަމްސީލުކުރައްވާ މެންބަރު އަދި ޕީއެންސީގެ ޕީޖީ ލީޑަރު އިބްރާހީމް ފަލާހު ވަރުގަދަ ރައްދެއް ދެއްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ސަރުކާރުގެ ފަރާތުން ލާމަރުކަޒީ ގާނޫނަށް ގެންނަން ހުށަހަޅާފައިވާ އިސްލާހު އަނބުރާ ގެންދިއުމަށް ގޮވާލާ އިދިކޮޅު އެމްޑީޕީން ހުށަހަޅާފައިވާ ޕެޓިޝަނަށް ބަހުސްކުރައްވަމުން ފަލާހު ވިދާޅުވީ، މި އިސްލާހަކީ ރަށްރަށުގައި ސަރުކާރުން ކުރިއަށްގެންދަން ރާވާފައިވާ ތަރައްގީގެ މަޝްރޫއުތައް ހުއްޓުމެއް ނެތި ހަލުވި ދުވެލީގައި ކުރިއަށް ގެންދިއުމުގެ ބޭނުމުގައި ހުށަހަޅާފައިވާ އިސްލާހެއް ކަމަށެވެ.
މީގެ އިތުރުން ލާމަރުކަޒީ ގާނޫނަށް ހުށަހެޅި އިސްލާހާ ދެކޮޅަށް އަދި އެ އިސްލާހު އޮތްގޮތަށް ފާސްކުރުމަށް އެދި ރައްޔިތުންގެ މަޖިލީހަށް ހުށަހެޅުނު ޕެޓިޝަންތަކުން މަޖިލީހުން ރައްޔިތުންނަށް ފަހިކޮށްދީފައިވާ ފުރުސަތުގެ ބޭނުން ރައްޔިތުން ހިފަމުންދާކަން ހާމަވަމުންދާކަން ފަލާހު ފާހަގަކުރެއްވިއެވެ. އަދި މި ނިޒާމުގެ ތެރެއިން ރައްޔިތުންނަށް ހިޔާލުފާޅުކުރުމުގެ ފުރުސަތު ފުޅާވެފައިވާ މިންވަރު ހާމަވާ ކަމަށްވެސް އޭނާ ވަނީ ވިދާޅުވެފައެވެ.
ފަލާހު ވިދާޅުވީ އިދިކޮޅު އެމްޑީޕީން މަސައްކަތް ކުރަމުންދަނީ މި އިސްލާހުގެ ހަގީގަތް އޮޅުވާލުމަށް ކަމަށެވެ. އަދި ދައުލަތުގެ ބޭނުމަކަށް ބިމެއް ނެގުމަކީ އަބަދުވެސް އޮންނަ އުސޫލެއް ކަމަށާއި، ނަމަވެސް އޭގެ މާނައަކީ ރައްޔިތުންނަށް ދޫކޮށްފައިވާ ގޯތިގެދޮރު ސަރުކާރުން އަތުލައިގަތުން ނޫން ކަމަށް އޭނާ ވަނީ ވިދާޅުވެފައެވެ.
”މި އިސްލާހުގައި މި ބުނަނީ ރަށެއްގެ ތަރައްގީއަށް ސަރުކާރުން ހިންގަން އުޅޭ މަޝްރޫއަކަށް ކައުންސިލަކުން ހުރަސްއަޅައި، އެ މަޝްރޫއު ހިންގާނެ ބިން ނުދީ ހިފަހައްޓައިފިނަމަ، ވަޒީރުންގެ މަޖިލީހުގެ މަޝްވަރާގެ މަތިން އެ ތަރައްގީގެ މަޝްރޫއު ހިންގުމަށްޓަކައި އެ ބިމެއް ބޭނުންކުރެވިދާނެ ވާހަކަ. މިއީ ވަރަށް ސާފުކޮށް، ތެދު ނިޔަތުގައި ބުނެފައި އޮތް ވާހަކައެއް،“ – ފަލާހު ވިދާޅުވިއެވެ.
ފަލާހު އިތުރަށް ވިދާޅުވީ، ގާނޫނުއަސާސީން ރައީސުލްޖުމްހޫރިއްޔާގެ މައްޗަށް މަތިކޮށްފައިވާ އެންމެ ބޮޑު ޒިންމާއަކީ ރައްޔިތުންނަށް ބޭނުންވާ ތަރައްގީގެ މަޝްރޫއުތައް ހިންގުމުގެ އިތުރުން އަސާސީ ހައްގުތައް ކަށަވަރުކޮށްދިނުން ކަމަށެވެ. އަދި ރައްޔިތުންނަށް ހަގީގަތް އޮޅޭގޮތަށް ވާހަކަނުދެއްކުމަށް އޭނާ ވަނީ އިދިކޮޅު ފަރާތްތަކުގެ ކިބައިން އެދިލައްވައިފައެވެ.
