ރަޝިޔާގެ އަސްކަރިއްޔާއިން ޔޫކްރޭނުގެ ސިޓީތަކަށް ދިން އާ ހަމަލާތަކެއްގައި ކީވްގެ ދާރްނިޓްސްކީ އަވަށުން މީހަކު މަރުވެ، ޒަޕޮރީޜިއާއިން ޑްރޯން ޙަމަލާއެއްގައި އެހެން މީހަކު މަރުވެއްޖެއެވެ. މި ޙަމަލާތައް ދީފައިވަނީ ކްރީވީ ރީގްގެ ވިޔަފާރި މަރުކަޒަކަށް ރަޝިޔާގެ ޑްރޯންތަކުން ދިން ”ޑަބަލް-ޓެޕް“ ހަމަލާގައި 16 މީހުން މަރުވެ، 130 މީހުން ޒަޚަމްވި ހާދިސާއަށްފަހުއެވެ.
ކީވްގެ ދާރްނިޓްސްކީ އަވަށުގެ ގުދަނަކަށް ރަޝިޔާގެ ބެލިސްޓިކް މިސައިލެއް ވެއްޓި އަލިފާން ރޯވުމުގެ ސަބަބުން މީހަކު މަރުވެ، އެތައް ބަޔަކު ވަނީ ޒަޚަމްވެފައެވެ. ޒަޕޮރީޜިއާގެ އަސްކަރީ އިދާރާއިން ހާމަކުރި ގޮތުގައި، ރަޝިޔާގެ ޑްރޯން ހަމަލާއެއްގައި އާންމު ފިރިހެނަކު މަރުވެ، 4 މީހަކު ވަނީ ޒަޚަމްވެފައެވެ.
ޔޫކްރޭނުގެ އެއާ ޑިފެންސް ސިސްޓަމްތަކަށް ބޭނުންވާ ޕެޓްރިއަޓް މިސައިލް މަދުވުމުގެ ސަބަބުން، ރަޝިޔާގެ ބެލިސްޓިކް މިސައިލްތައް ހުއްޓުވުމަށް ވަނީ ބޮޑެތި ގޮންޖެހުންތަކާ ކުރިމަތިވެފައެވެ.
