ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް، އިދިކޮޅު އެމްޑީޕީގެ އިސް ލީޑަރުންނާއެކު ގުޅުން ބަދަހިކުރައްވަމުން ގެންދަވާތީ، ވެރިކަންކުރާ ޕީއެންސީގެ އިސް ސަފުގައި ހިމެނިވަޑައިގަންނަވާ ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވަރުގަދަ ރައްދެއް ދެއްވައިފިއެވެ.
މެންބަރު ޝުޖާއު މި ރައްދު ދެއްވާފައިވަނީ ކުރީގެ ރައީސް އަދި އެމްޑީޕީގެ ޗެއާޕާސަން މުޙައްމަދު ނަޝީދާއިއެކު ރައީސް ޔާމީން ތިނަދޫ ސިޓީއަށް ކުރައްވަމުން ގެންދަވާ ދަތުރުފުޅަށް އިޝާރާތްކުރައްވައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.
ޝުޖާއު ވިދާޅުވީ، ބިނާކުރަނިވި ފިކުރުގެ ލީޑަރަކަށް ވުމުގެ ޚާއްޞަ ޝަރުތަކީ އެމްޑީޕީގެ ލީޑަރުންނާއެކު ސިޔާސީ ”އެއްދާން ނުކުރުން“ ކަމަށް އެންމެ އަޑުހަރުކޮށް މީގެ ކުރިން ވިދާޅުވީ ޚުދު ރައީސް ޔާމީން ކަމަށެވެ. އަދި ޕީޕީއެމްގެ ކުރީގެ ރައީސް، ރައީސް މައުމޫން ޢަބްދުލްޤައްޔޫމާއި ޕާޓީގެ ސަޕޯޓަރުން ދުރުކުރުމަށް ރައީސް ޔާމީން ބޭނުންކުރެއްވި އެންމެ ބޮޑު އެއް ސިޔާސީ ހަތިޔާރަކީ ވެސް ރައީސް މައުމޫން އެމްޑީޕީގެ ލީޑަރުންނާއެކު ސިޔާސީ ގުޅުން ބޭއްވެވި ކަމަށް ބުނެ ދެއްކެވި ވާހަކަފުޅުތައް ކަން ޝުޖާއު ފާހަގަކުރެއްވިއެވެ.
ރައީސް ޔާމީން ޖަލުގައި އޮންނެވި ދުވަސްވަރު ވެސް އަދި މިހާރު ވެސް، ޕީއެންސީގެ ލީޑަރުން އެމްޑީޕީއާއެކު ސިޔާސީ އެއްދާން ކޮށްފައި ނުވާނެ ކަމަށް ޝުޖާއު ވިދާޅުވިއެވެ. ނަމަވެސް، މިއަދު ފެންނަނީ އެ އުސޫލުތަކުގެ ވާހަކަ ދެއްކެވި ރައީސް ޔާމީން، އަމިއްލަ އެދުންފުޅު އިސްކުރައްވައި، މުންޑު އަޅުއްވައިގެން އެމްޑީޕީގެ އިސް ލީޑަރުންނާއެކު ހިނިވަރުނަ ކުރައްވާ މަންޒަރު ކަމަށް އޭނާ ސިފަކުރެއްވިއެވެ.
ތާރީޚުން މާކުރިއެއް ނޫނެވެ.އަދި ހިތުން ފިލާގެން ދާހާ ދުވަހެއް ވެސް ނުވެއެވެ.
ބިނާ ކުރަނިވި ފިކުރުގެ ލީޑަރަކަށް ވުމުގެ ޚާއްޞަ ޝަރުތެއް އޮވެއެވެ.އެއީ MDP ގެ ލީޑަރުންނާއެކު ސިޔާސީ އެއްދާން ނުކުރުމެވެ.މިވާހަކަ އެންމެ އަޑުހަރުކޮށް އަޅުގަނޑުމެންގެ ކަންފަތްތަކަށް އިއްވީ ރައީސް… pic.twitter.com/94QGNTJvo2— Ibrahim Shujau (@IbrahimShujaau) August 22, 2026
މީގެއިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭ ސިޓީގެ މޭޔަރު ކަމުގައި ހުންނެވި ދުވަސްވަރު އެމްޑީޕީގެ ސަރުކާރުން ބޭއްވި ރަސްމީ ހަފްލާތަކަށް ދަޢުވަތު އެރުވުމުން ވެސް އެކަންކަމަށް ވަޑައިނުގެންނެވީ، އެއިރުގެ ލީޑަރު ރައީސް ޔާމީނަށް ސިޔާސީ އަނިޔާ ދެމުންދާތީ އެކަމާ ދެކޮޅަށް އިހުތިޖާޖު ކުރެއްވުމުގެ ގޮތުން ކަމަށް ޝުޖާއު ވިދާޅުވިއެވެ. ރައީސް ޑރ. މުޢިއްޒަށް އޭރު ފަސޭހަ ގޮތް އިޚްތިޔާރު ކުރެއްވެން އޮތް ނަމަވެސް، ޤަބޫލުކުރެއްވި އުސޫލުތައް ނަގަހައްޓަވައި އެ ގޮތުގައި ސާބިތުވެ ތިއްބެވި ކަމަށް ވެސް އޭނާ ވިދާޅުވިއެވެ.
ޝުޖާއު އިތުރަށް ވިދާޅުވީ، މިއަދު ރައީސް ޑރ. މުޢިއްޒާއެކު ތިބި ލީޑަރުން ތިބީ އޭރުވެސް އަދި މިހާރުވެސް ޤަބޫލުކުރި ހަމަތަކާއި އުސޫލުތަކުގައި ބާރަށް ހިފަހައްޓައިގެން ކަމަށެވެ. އަދި އަމިއްލަ އެދުން އިސްކޮށްގެން ސިޔާސީ މަސައްކަތްކުރާ ލީޑަރުންނާއި، އިޚްލާޞްތެރިކަމާއެކު އުސޫލުތަކުގައި ދެމިތިއްބެވި ލީޑަރުން މިހާރު ރައްޔިތުންނަށް ވަރަށް ސާފުވާނެ ކަމަށް ވެސް ޝުޖާއު ވިދާޅުވިއެވެ.
ސުޖާއު ބުންޏަސް ތެދެއްވާނީ ހަމަ ތެދަކަޢް މިވަރުގެ ތެދުބަހެއް މީހަކަޢް ބުނެވޭނީ