ސިނަމާލެ ބްރިޖާ ގުޅިފައިވާ ހައިވޭގައި ބާރު ސްޕީޑުގައި ދުއްވި ކާރެއް ކޮންޓްރޯލުން ނެއްޓި، ސޯލާ ޕެނަލްތަކުގައި ޖެހި ހިނގި ނުރައްކާތެރި އެކްސިޑެންޓާ ގުޅިގެން އެ އުޅަނދު ދުއްވަން އިން މީހާގެ ލައިސަންސް ފުލުހުން ހިފަހައްޓައިފިއެވެ.
މި ހާދިސާ ހިނގާފައިވަނީ މިދިޔަ ހަފުތާގެ ހުކުރު ދުވަހުގެ ހެނދުނު 08:42 ހާއިރުއެވެ. ބާރު ސްޕީޑުގައި ދަތުރުކުރުމުގެ ސަބަބުން އެ ކާރު ވަނީ ކޮންޓްރޯލް ނުވެ، ސޯލާ ޕެނަލްތައް ހަރުކޮށްފައިވާ ދަގަނޑު ހޮޅިދަނޑިތަކުގައި ޖެހިފައެވެ. މި ހާދިސާގައި ކާރަށާއި އެ ސަރަހައްދުގައި ހަރުކޮށްފައިވާ ސޯލާ ޕެނަލްތަކަށް ވަނީ ބޮޑެތި ގެއްލުންތަކެއް ލިބިފައެވެ.
ބްރިޖް ހައިވޭގައި ދުއްވާފައި ދިޔަ ކާރެއް ކޮންޓްރޯލްނުވެ ގޮސް، ސޯލާ ޕެނަލްތައް ހަރުކޮށްފައި ހުރި ހޮޅިދަނޑިތަކުގައި ޖެހި ހިނގި އެކްސިޑެންޓާ ގުޅޭ pic.twitter.com/9EZLW7PVR4
— Maldives Police (@PoliceMv) August 22, 2026
މި ހާދިސާ ހިނގާދިޔަ ވަގުތު ކާރުގައި ތިބީ ޙަސަން ރިފާއު، މިޔްނިކް / ބ. ކަމަދޫ (40) އާއި 13 އަހަރުގެ ކުޑަކުެއްޖެއް ކަމަށް ފުލުހުން މައުލޫމާތުދެއެވެ. އެ ދެ މީހުންނަށް ޓްރީޓޮޕް ހޮސްޕިޓަލުގައި ފަރުވާދިނުމަށްފަހު މިހާރު ވަނީ ދޫކޮށްލައިފައެވެ. އަދި އެ ދެ މީހުންނަށް މާބޮޑު ސީރިއަސް އަނިޔާތަކެއް ލިބިފައިނުވާ ކަމަށް ހޮސްޕިޓަލާ ހަވާލާދީ ފުލުހުން ވަނީ ބުނެފައެވެ.
މި ހާދިސާގައި ކާރަށް ބޮޑެތި ގެއްލުންތަކެއް ލިބި، ބޭނުންނުކުރެވޭ ވަރަށް ހަލާކުވެފައިވާއިރު، މައްސަލައިގެ ތަހުގީގަށް ބޭނުންވާ މައުލޫމާތުތައް އެއްކުރުމަށްފަހު ކާރުގެ ބައިތައް އޭގެ ވެރިފަރާތާ ހަވާލުކޮށްފައިވާ ކަމަށް ފުލުހުން ވަނީ ބުނެފައެވެ. ފުލުހުން ބުނީ މި މައްސަލައާ ގުޅިގެން ކާރު ދުއްވަން ހުރި ޙަސަން ރިފާޢުގެ ޑްރައިވިންގ ލައިސަންސް ވެސް މިހާރު ވަނީ ހިފަހައްޓާފައިވާ ކަމަށެވެ.
މި ހާދިސާއާ ގުޅިގެން ބަލަންޖެހޭ ބަލަމުން އަންނަ ކަމަށް ފުލުހުން ވަނީ ބުނެފައެވެ.
