ސިނަމާލެ ބްރިޖު ހައިވޭގައި ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލުން ނެއްޓި، ބްރިޖުގައި ހަރުކޮށްފައި ހުރި ސޯލާ ޕެނަލްތަކުގައި ޖެހި ނުރައްކާތެރި އެކްސިޑެންޓެއް ހިނގައިފިއެވެ.
މި ހާދިސާ ހިނގާފައިވަނީ މިއަދު ގާތްގަނޑަކަށް 7:30 ހާއިރު ކަމަށް މައުލޫމާތު ލިބެއެވެ.
މަންޒަރު ދުށް ފަރާތްތަކުން ބުނާ ގޮތުގައި، ބާރު ސްޕީޑުގައި ދަތުރުކުރި އެ ކާރު ސޯލާ ޕެނަލްތަކުގައި ޖެހުމާއެކު ފުރޮޅާލައި، އޮތީ ބަންޑުން ޖެހިފައެވެ. އަދި މި ހާދިސާގައި ބްރިޖުގެ ސޯލާ ޕެނަލްތަކަށް ވެސް ބޮޑެތި ގެއްލުންތަކެއް ލިބި، އޭގެ ބައެއް ބައިތައް މަގުމައްޗަށް ވެއްޓިފައިވާ ކަމަށްވެސް އެނގިފައިވެއެވެ.
އެކްސިޑެންޓްވި ވަގުތު އެ ކާރުގެ ތެރޭގައި ތިބި މީހުންގެ ތެރޭގައި ކުޑަކުއްޖަކު ވެސް ހިމެނޭ ކަމަށާއި، އެމީހުން އެހެން ކާރެއްގައި އެ ސަރަހައްދުން ގެންގޮސްފައިވާ ކަމަށް މަންޒަރު ދުށް މީހުން ވަނީ ބުނެފައެވެ. ނަމަވެސް، އެމީހުންނަށް ލިބުނު އަނިޔާގެ އެއްވެސް ތަފްސީލެއް އަދި އެމީހުންގެ ހާލަތެއް އަދި މިހާތަނަށް ސާފުވާގޮތެއް ނުވެއެވެ.
ފުލުހުން ބުނީ ބްރިޖް ހައިވޭގައި ދުއްވާފައި ދިޔަ ކާރެއް ކޮންޓްރޯލުން ނެއްޓި، ސޯލާ ޕެނަލްތައް ހަރުކޮށްފައި ހުރި ހޮޅިދަނޑިތަކުގައި ޖެހި އެކްސިޑެންޓެއް ހިނގާފައިވާ ކަމުގެ މައުލޫމާތު 2026 އޯގަސްޓް 21 ވަނަ ދުވަހުގެ ހެނދުނު 08:42 ހާއިރު ފުލުހުންނަށް ރިޕޯޓްކޮށްފައިވާކަމަށެވެ.
މި ހާދިސާ ހިނގި ވަގުތު ކާރުގައި ބޮޑު މީހަކާއި ކުޑަކުއްޖަކު ތިބި އިރު، އެ ދެ މީހުންނަށް މިހާރު ދަނީ ޓްރީޓޮޕް ހޮސްޕިޓަލުގައި ފަރުވާ ދެމުންނެވެ. މި އެކްސިޑެންޓުގައި އެއްވެސް މީހަކަށް ސީރިއަސް އަނިޔާއެއް ލިބިފައި ނުވާ ކަމަށް ވަނީ މަޢުލޫމާތު ލިބިފައެވެ. އެހެންނަމަވެސް ކާރަށް ވަނީ ބޮޑެތި ގެއްލުންތަކެއް ވެފައި ކަމަށް ފުލުހުން ބުނެއެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
މި ހާދިސާއާ ގުޅިގެން ފުލުހުން މިހާރު ދަނީ އެ ސަރަހައްދުގައި ހަރަކާތްތެރިވަމުންނެވެ.
