މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިދިޔަ ހަފުތާގައި އެކަނިވެސް 1,655 ކޮންޓެއިނަރުގެ މުދާ ކްލިއަރކޮށްފައިވާ ކަމަށް އެ ކުންފުނިން ހާމަކޮށްފިއެވެ.
މިކަމާ ގުޅިގެން އެމްޕީއެލްއިން ބުނެފައިވަނީ ކްލިއަރ ކުރެވުނު މުދަލުގެ ތެރޭގައި އެންމެ ގިނައީ އަސާސީ ކާބޯތަކެތީގެ ގޮތުގައި ބޭނުންކުރާ ބިހާއި ފިޔާ ކަމަށެވެ. އެމްޕީއެލްއިން އާންމުކޮށްފައިވާ ތަފާސްހިސާބުތައް ދައްކާގޮތުން، މި މަހުގެ 9 ވަނަ ދުވަހުން ފެށިގެން 15 ވަނަ ދުވަހާއި ހަމައަށް ކޮންޓެއިނަރު އުފުލާ ބޯޓުފަހަރާއި އާންމު މުދާ އުފުލާ ބޯޓުފަހަރުން ޖުމުލަ 40,275.52 ފްރައިޓް ޓަނުގެ މުދާ ކްލިއަރ ކޮށްފައިވެއެވެ. މީގެ ތެރޭގައި ކޮންޓެއިނަރު އުފުލާ ބޯޓުފަހަރުން ގެނައި 1،312 ކޮންސައިންމަންޓުގެ 38,088.37 ފްރައިޓް ޓަނާއި، އާންމު މުދާ އުފުލާ ބޯޓުފަހަރުން ގެނައި 343 ކޮންސައިންމަންޓުގެ 2،187.15 ފްރައިޓް ޓަން ހިމެނެއެވެ.
މި މުއްދަތުގައި މާލޭ ވިޔަފާރި ބަނދަރަށް ކޮންޓެއިނަރު އުފުލާ އެއް ބޯޓާއި، އާންމު މުދާ އުފުލާ 4 ބޯޓު ކައިރިކޮށްފައިވާއިރު، ކޮންޓެއިނަރު އުފުލާ 4 ބޯޓާއި އާންމު މުދާ އުފުލާ 3 ބޯޓު ވަނީ ފުރާފައިވެއެވެ. ބަނދަރުގެ އޮޕަރޭޝަންތަކަށް ބަލާއިރު، 766 ކޮންޓެއިނަރު ބޭލުމާއި 1،287 ކޮންޓެއިނަރު ބޭރުކުރުމާއެކު ޖުމްލަ 2،053 ކޮންޓެއިނަރުގެ އޮޕަރޭޝަން ހިންގާފައިވެއެވެ.
އެމްޕީއެލްއިން މައުލޫމާތު ދީފައިވާ ގޮތުގައި މިދިޔަ ހަފުތާގައި އެކަނިވެސް އަވަހަށް ހަލާކުވާ ޒާތުގެ މޭވާއާއި ތަރުކާރީ ފަދަ ތަކެތީގެ 62,092 ޕެކޭޖު ކްލިއަރ ކޮށްފައިވާ ކަމަށެވެ. އެންމެ ގިނައިން ކްލިއަރ ކުރެވުނު ބާވަތްތަކުގެ ތެރޭގައި 17,097 ކޭސް ބިސް، 10,836 ބަސްތާ ފިޔާ، 7,311 ކޭސް ކަރާ، 6,575 ބަސްތާ އަލުވި އަދި 4,877 ކޭސް ޓޮމާޓޯ ހިމެނެއެވެ.
ވިޔަފާރި ބަނދަރުގެ ހިދުމަތްތައް މިހާރަށްވުރެ ބޮޑަށް ހަރުދަނާ ކުރުމުގެ ގޮތުން، ޕޯޓު ތިލަފުއްޓަށް ބަދަލުކުރުމުގެ މަސައްކަތް ސަރުކާރުން އަންނަނީ ހަލުވި ދުވެލީގައި ކުރިއަށް ގެންދަމުންނެވެ. ސަރުކާރުން އަމާޒު ހިފާފައިވަނީ 2027 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހު ތިލަފުށީ ބަނދަރު ހުޅުވައި ހިދުމަތް ދޭން ފެށުމެވެ.
