މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ މުވައްޒަފުންނަށް އަމާޒުކޮށްގެން ހިންގަން ނިންމި ބޯހިޔާވަހިކަމުގެ މަޝްރޫއު ހުއްޓިފައިވާތީ އެ މަޝްރޫއު އަލުން ފެށުމަށް ވާންޖެހޭ ތައްޔާރީތައް ވާން ފަށައިފިއެވެ.
މި މަޝްރޫއު އަލުން ފެށުމަށް ބޭނުންވާ ބިން ހަމަޖެއްސުމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އާއެކު އެމްޓީސީސީން އިއްޔެ ވަނީ މަޝްވަރާ ބައްދަލުވުންތަކެއް ވެސް ބާއްވައިފައެވެ. މި ބައްދަލުވުމުގައި އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީއާއި، އެޗްޑީސީގެ މެނޭޖިންގ ޑިރެކްޓަރު، ޢަލީ ޒުހައިރުގެ އިތުރުން އެ ދެ ކުންފުނީގެ ބައެއް އިސްވެރިން ބައިވެރިވެވަޑައިގެންނެވިއެވެ.
މި ބައްދަލުވުމަކީ އެމްޓީސީސީގެ މުވައްޒަފުންނަށް ހާއްސަކޮށްގެން ކުރިއަށްގެންދާ ބޯހިޔާވަހިކަމުގެ މަޝްރޫއަށް ބޭނުންވާ 12،000 އަކަފޫޓުގެ ބިން ގަތުމާ ގުޅޭ އިދާރީ ކަންކަން ނިންމުމަށް ބޭއްވި ބައްދަލުވުމެއް ކަމަށް އެ ކުންފުނިން ބުނެއެވެ.
އެމްޓީސީސީން ބުނެފައިވާ ގޮތުގައި ހިޔާ މަޝްރޫއުގެ ދަށުން އެ ކުންފުނީގެ ޓަވަރުތައް ތަރައްގީކުރެވިފައި ނުވުމަކީ ކުންފުނީގެ މުވައްޒަފުން އިންތިހާއަށް މާޔޫސްކުރުވި ކަމެކެވެ. ކަންމިހެން އޮތުމުން އެމްޓީސީސީގެ ބޯޑާއި މެނޭޖްމަންޓުން، މުވައްޒަފުންގެ ހެވާއި ލާބަޔަށްޓަކައި ކޮށްދޭންޖެހޭ ކަމެއްގެ ގޮތުގައި ދެކިގެން އެކަންކޮށްދޭނެ ކަމުގެ ޔަގީންކަން އެ ކުންފުނިން ވަނީ ދީފަފައެވެ.
އެމްޓީސީސީން ބުނީ އަބަދުވެސް ކުންފުނީގެ މުވައްޒަފުން ކުރާ ބުރަ މަސައްކަތުގެ އަގުވަޒަން ކުރާނެ ކަމަށާއި، އަމާޒަކީ ބިން ހަމަޖެހުނުހާ އަވަހަށް މަޝްރޫއުގެ އަމަލީ މަސައްކަތް ފެށުން ކަމަށެވެ.
