ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ އަމާން އުދަރެސް އަދި އަމާން ދޯދި ޓަވަރުތަކުގައި ދިރިއުޅޭ ރައްޔިތުންނާ މިއަދު ބައްދަލުކުރުމަށް އެ ކުންފުނިން ނިންމައިފިއެވެ.
އެފްޑީސީން ވަނީ ”އަމާން މުޖުތަމައުއަކަށް އެންމެންގެ ހިއްސާ“ ގެ ނަމުގައި ބާއްވާ މި ކޮމިއުނިޓީ ބައްދަލުވުމުގައި އެންމެން ވެސް ބައިވެރިވުމަށް އެދި ދައުވަތު ދީފައެވެ. އަމާން އުދަރެސް / ދޯދި ޓަވަރުތަކުގައި ދިރިއުޅޭ ރައްޔިތުންނާ އެފްޑީސީން ބައްދަލުކުރުން އޮންނާނީ މިއަދު ހަވީރު 16:00 އިން ފެށިގެން އިރުއޮއްސި 18:00 އާއި ހަމައަށް އަމާން އުދަރެސް 14 ޕާކިންގ އޭރިއާގައެވެ.
މި ބައްދަލުވުމާ ގުޅޭގޮތުން ”އެކި އެމްވީ“ އަށް މައުލޫމާތުދެއްވަމުން އެފްޑީސީގެ މެނޭޖިންގ ޑިރެކްޓަރު ހަމްދާން ޝަކީލް ވިދާޅުވީ މި ކޮމިއުނިޓީ ބައްދަލުވުމަކީ އަމާން ޓަވަރުތަކުގައި އެންމެ ފުރަތަމަ މީހުން ދިރިއުޅެން ފެށި ސަރަހައްދުގައި ޕާކިންގ މަސައްކަތް ނިންމުމާއި، އެ ސަރަހައްދު ފެހިކުރަން ހިންގާ ޕްރޮގްރާމު ލޯންޗުކުރުމުގެ ބޭނުމުގައި ބާއްވާ ކޮމިއުނިޓީ ބައްދަލުވުމެއް ކަމަށެވެ.
އަމާން ޓަވަރުތަކުގައި މީހުން ދިރިއުޅެން ފަށާފައިވަނީ މިދިޔަ ސެޕްޓެމްބަރު މަހުގެ ތެރޭގައެވެ. އެފަހުން މިއީ އެފްޑީސީން އެ ސަރަހައްދުގައި ދިރިއުޅޭ ރައްޔިތުންނާ ބައްދަލުކުރާ ފުރަތަމަ ފަހަރުކަން ފާހަގަކޮށްލެވެއެވެ.
