މި އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 3 ލައްކައަށްވުރެ ގިނަ ފަތުރުވެރިން ގެސްޓުހައުސްތަކުގައި ޗުއްޓީ ހޭދަކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
ޓުރިޒަމް މިނިސްޓްރީގެ ތަފާސްހިސާބުތައް ދައްކާގޮތުން، 1،379،151 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިދިޔަ 2025 ވަނަ އަހަރުގެ މިހާތަނަށް ރާއްޖެއަށް ޒިޔާރަތްކޮށްފައިވަނީ 1,435,661 ފަތުރުވެރިންނެވެ. އެހެންކަމުން މިއީ 3.9 އިންސައްތައިގެ ދަށްވުމެއްކަން ފާހަގަކޮށްލަންޖެހެއެވެ.
އަހަރުގެ މިހާތަނަށް ރާއްޖެއަށް ޒިޔާރަތްކުރި 1،389،151 ފަތުރުވެރިންގެ ތެރެއިން 992،462 ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. އަދި 300,469 ފަތުރުވެރިން ގެސްޓްހައުސްތަކުގައި ޗުއްޓީ ހޭދަކޮށްފައިވާއިރު، ހޮޓެލްތަކުގައި 31,723 ފަތުރުވެރިން ޗުއްޓީ ހޭދަކޮށްފައިވެއެވެ. ހަމައެހެންމެ، ސަފާރީތަކުގައި 25,207 ފަތުރުވެރިން ޗުއްޓީ ހޭދަކޮށްފައިވާ ކަމަށް ވެސް މިނިސްޓްރީގެ ތަފާސްހިސާބުތަކުން ދައްކައެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުގައި ރާއްޖެއަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކޮށްފައިވަނީ ޗައިނާ، ރަޝިޔާ އަދި އިނގިރޭސިވިލާތުންނެވެ. އެގޮތުން ޗައިނާއިން 250,437 ފަތުރުވެރިން، ރަޝިޔާއިން 198,748 ފަތުރުވެރިން އަދި އިނގިރޭސިވިލާތުން 105,785 ފަތުރުވެރިން ޒިޔާރަތްކޮށްފައިވެއެވެ.
ފާހަގަކޮށްލަންޖެހޭ ގޮތުގައި މި ސަރުކާރުން އަންނަނީ ގެސްޓްހައުސްގެ ވިޔަފާރި މުޅި ރާއްޖެއަށް ފުޅާކުރުމަށް ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖޭގައި މިވަގުތު 116 ގެސްޓްހައުސް ހިންގަމުންދާއިރު، އެތަންތަނުން ވަނީ ޖުމުލަ 17,188 އެނދު ނެރެފައެވެ.
