ފާއިތުވި މަސްދުވަހުގެ ތެރޭގައި ސަޢޫދީ ޢަރަބިއްޔާގެ ތެޔޮ ބޯޓުތަކަށާއި، އަސްކަރީ އަމާޒުތަކަށް، އަދި އިޤްތިޞާދީ ވަސީލަތްތަކަށް އަމާޒުކޮށް 31 އަސްކަރީ އޮޕަރޭޝަނެއް ހިންގާފައިވާނެ ކަމަށް ޔަމަނުގެ ހޫޘީ ޖަމާޢަތުން ބުނެފިއެވެ. ހޫޘީންގެ އަސްކަރީ ތަރުޖަމާނު ޢާންމުކުރި ބަޔާނެއްގައި ބުނެފައިވަނީ، މި ޙަމަލާތަކަކީ ސަޢޫދީވިލާތުން ޔަމަނުގެ ޞަންޢާ އެއާޕޯޓަށާއި ޙުދައިދާ ބަނދަރަށް ދިން ޙަމަލާތަކުގެ ރައްދުގައި ދީފައިވާ ޙަމަލާތަކެއް ކަމަށެވެ.
ޖުލައި 20 އިން އޮގަސްޓް 19 އަށް ހޫޘީން ވަނީ ސަޢޫދީގެ 8 ތެޔޮ ބޯޓަކަށް ޙަމަލާދީ، އަދި 48 ތެޔޮ ބޯޓެއް ސަރަޙައްދީ ކަނޑުއޮޅިތަކުން ދަތުރުކުރުން ހުއްޓުވާފައިވާ ކަމަށް ދަޢުވާކޮށްފައެވެ. ސަޢޫދީގެ ޔަންބު، ނަޖްރާން، ޖީޒާން، އަބްހާ އަދި އިރުމަތީ ޕްރޮވިންސްގެ ތެޔޮ ވަސީލަތްތަކަށް އަމާޒުކޮށް 9 ޙަމަލާއެއް ދީފައިވާ ކަމަށް ހޫޘީން ބުނެއެވެ.
މި ދަޢުވާތަކާ ގުޅިގެން ސަޢޫދީ ޢަރަބިއްޔާގެ އޮފިޝަލުން އަދި ވަކި އެއްޗެއް ބުނެފައެއް ނުވެއެވެ. ނަމަވެސް މި ޙަމަލާތަކުގެ ސަބަބުން ރަތް ކަނޑުގެ ކަނޑުދަތުރުފަތުރަށް އޮތް ނުރައްކާ ވަނީ އިތުރުވެފައެވެ.
