މާލެ މާރުކޭޓް ކޮމްޕްލެކްސް ތަރައްގީކުރުމަށް ހަމަޖެހިފައިވާ ބިން 1 މަސްދުވަހުގެ ތެރޭގައި ހުސްކުރުމުގެ މަސައްކަތް ކުރަމުން އަންނަ ކަމަށް ފިޝަރީޒް މިނިސްޓްރީން ހާމަކޮށްފިއެވެ.
މާލެ މާރުކޭޓް ކޮމްޕްލެކްސް ޒަމާޏީ ފެންވަރަށް ތަރައްގީކުރުމުގެ މަސައްކަތް ޓްރަސްޓެންގ މޯލްޑިވްސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ ހަވާލުކޮށްފައިވަނީ މިދިޔަ މާރިޗު މަހުގެ ތެރޭގައެވެ. މި މަޝްރޫއަކީ މާލޭގައި މިހާރު ހިންގަމުންދާ ހުރިހާ މާރުކޭޓެއް އެއް ފުރާޅެއްގެ ދަށަށް ބަދަލުކުރުމަށް ކުރަމުން އަންނަ މަސައްކަތުގެ ދަށުން ކުރިއަށްގެންދާ މަޝްރޫއެކެވެ. އަދި މިއީ މާލޭގައި މިވަގުތު ކުރިއަށްގެންދަން ރާވާފައިވާ އެންމެ ބޮޑު އެއް މަޝްރޫއުކަން ވެސް ފާހަގަކޮށްލެވެއެވެ.
މި މަސައްކަތް ހަވާލުކޮށްފައި އޮންނަތާ 5 މަސްދުވަސް ވެފައިވާއިރު ވެސް މަޝްރޫއުގެ އަމަލީ މަސައްކަތް މިހާތަނަށް ނުފެށިވަނީ އެކަމަށް ބޭނުންވާ ބިން މާލެ ސިޓީ ކައުންސިލުން މިނިސްޓްރީއާ ހަވާލުކޮށްފައިނުވުމުން ކަމަށް ސަރުކާރުން ވަނީ ހާމަކޮށްފައެވެ. މާލެ މާރުކޭޓް ކޮމްޕްލެކްސް ތަރައްގީކުރުމަށް ހަމަޖެހިފައިވަނީ މިހާރުގެ ލޯކަލް މާރުކޭޓް ހުރި ބިމުގައި ކަމަށްވާތީ ވަގުތީ މާރުކޭޓު އެހެން ސަރަހައްދަކަށް ބަދަލުކޮށް 1 މަސްދުވަހުގެ ތެރޭގައި ބިން ހުސްކުރުމަށް މަސައްކަތް ސަރުކާރުން އަންނަނީ ކުރަމުންނެވެ. ވަގުތީ މާރުކޭޓް ހެދުމަށް ކުރީގެ އެސްޓީއޯ ހުރި ތަނާއި ތައިސޭކޮށި ބަލަމުން އަންނަ ކަމަށް ސަރުކާރުން ބުނެއެވެ.
ޖުމުލަ 126.4 މިލިއަން ރުފިޔާގެ މި މަޝްރޫއުގެ ދަށުން 15،525 އަކަފޫޓުގެ ބިމެއްގައި 6 ފަންގިފިލާގެ އިމާރާތެއް ތަރައްގީކުރުމަށް ވަނީ ހަމަޖެހިފައެވެ. މި އިމާރާތުގެ ހާއްސަ ސިފަތަކަށް ބަލައިލާއިރު، އިމާރާތުގެ ބޭސްމަންޓް ހާއްސަކޮށްފައިވަނީ ސައިކަލު ޕާކުކުރުމަށެވެ. އަދި ގްރައުންޑް ފްލޯގައި މަސް މާރުކޭޓެއް، ފުރަތަމަ ތިން ފަންގިފިލާގައި ދަނޑުވެރިކަމުގެ އުފެއްދުންތަކާއި މޭވާ އަދި ތަރުކާރީ މާރުކޭޓު ހިމެނެއެވެ. އަދި މި އިމާރާތުގައި ޖުމުލަ 455 ގޮޅި ހިމެނޭނެއެވެ. އަދި ޓެރަސްގައި ފުޑްކޯޓެއް ތަރައްގީކުރުމަށް ވަނީ ހަމަޖެހިފައެވެ.
ސަރުކާރުގެ ޢަމާޒަކީ މި މަސައްކަތް 1 އަހަރާއި 8 މަސްދުވަހުގެ ތެރޭގައި ނިންމައިލުމެވެ.
