ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ އަމާން ދޯދި އަދި އަމާން އުދަރެސް ޓަވަރުތަކުގައި ސީސީޓީވީ ކެމެރާ ހަރުކުރުމުގެ އެންމެހާ މަސައްކަތްތައް ނިމިފައިވާކަމަށް ފަހި ދިރިއުޅުން ކޯޕަރޭޝަނުން ބުނެފިއެވެ.
ސޯޝަލް ހައުސިންގެ ދަށުން ހުޅުމާލެ ދެވަނަ ފިޔަވަހީގައި އެންމެ ފަހުން މީހުން ދިރިއުޅެން ފެށި މި މަޝްރޫޢުގެ ދަށުން އަމާން ދޯދީގެ 16 ޓަވަރާއި އަމާން އުދަރެހުގެ 16 ޓަވަރާއެކު ޖުމުލަ ތިރީސް ދެ ޓަވަރު ވަނީ ތަރައްޤީކޮށްފައެވެ.
އަމާން އުދަރެހުގެ ޓަވަރުތަކުގައި ކެމެރާ ހަރުކޮށް، ޓެސްޓްކޮށް އަދި ސީސީޓީވީ އޮޕަރޭޝަންގެ އެންމެހާ އިންތިޒާމްތައް މިހާރުވަނީ ފުރިހަމަކޮށްފައެވެ. އަދި އަމާން ދޯދީގެ ޓަވަރުތަކުގައި ކެމެރާ ހަރުކޮށް ނިމިފައިވާއިރު، މިހާރު ކުރިއަށްދަނީ ކެމެރާ ސިސްޓަމްތައް ޓެސްޓްކުރުމާއި އޮޕަރޭޝަންގެ އެންމެ ފަހުގެ ތައްޔާރީތައް ކަމަށް ފަހި ދިރިއުޅުން ކޯޕަރޭޝަނުން މަޢުލޫމާތުދެއެވެ.
މި މަސައްކަތަކީ އެ ޓަވަރުތަކުގައި ދިރިއުޅޭ ރައްޔިތުންނާއި އެ ސަރަޙައްދު ބޭނުންކުރާ ފަރާތްތަކުގެ ރައްކާތެރިކަން ކަށަވަރުކުރުމަށް ކުރިއަށްގެންދާ މުހިންމު މަސައްކަތެކެވެ. މި ސަރަޙައްދުތައް ސީސީޓީވީ ކެމެރާ މެދުވެރިކޮށް 24 ގަޑިއިރު ބަލަހައްޓަމުންދާނެ ކަމަށް އެފްޑީސީން ބުނެފައިވެއެވެ.
މި ސަރަޙައްދުގައި ދިރިއުޅޭ ރައްޔިތުންނަށް ދިމާވެފައިވާ އެންމެ ބޮޑު އެއް ގޮންޖެހުމަކީ ހުއްދަ ނޫން ސަރަޙައްދުތަކަށް ކުނި އެޅުމުގެ މައްސަލައެވެ. ސީސީޓީވީ ކެމެރާތައް ފުރިހަމަ އޮޕަރޭޝަނަކަށް ގެނައުމާއެކު، ޤަވާއިދާ ޚިލާފަށް ކުނި އަޅާ ފަރާތްތައް ދެނެގަނެ އެފަދަ ފަރާތްތަކާމެދު ޤާނޫނީ ފިޔަވަޅު އަޅާނެކަމުގެ އިންޒާރުވެސް އެ ކޯޕަރޭޝަނުން ދީފައިވެއެވެ.
