ޕީޖީއޯ 2.0 އާއެކު ބޮޑެތި މައްސަލަތައް ވެސް 48 ގަޑިއިރު ތެރޭގައި ކޯޓަށް ފޮނުވޭނެ ކަމަށް ޕްރޮސެކިއުޓަރ ޖެނެރަލް އައްބާސް ޝަރީފް ވިދާޅުވެއްޖެއެވެ.
ޕީޖީއޯ 2.0 އަކީ ޕްރޮސިކިއުޓަރ ޖެނެރަލް އޮފީހުގެ މަސައްކަތްތައް އާޓިފިޝަލް އިންޓެލިޖެންސް (އޭއައި) މެދުވެރިކޮށް މަސައްކަތްތައް އަވަސްކޮށް ޑިޖިޓަލައިޒް ކުރުމަށް ކުރިއަށްގެންދާ މަޝްރޫއެކެވެ. އެ އޮފީހުގެ މަސައްކަތްތައް ޑިޖިޓަލައިޒް ކުރުމަށް 2 އަހަރު ދުވަހުގެ މަޝްރޫއެއް ކުރިއަށް ގެންދިއުމަށް ހަމަޖެހިފައިވާއިރު، މިކަމުގެ ސަބަބުން ގިނަ ފައިދާތަކެއް ލިބިގެންދާނެ ކަމަށް އެ އޮފީހުން ބުނެއެވެ.
މިކަމާ ގުޅިގެން ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން އައްބާސް ވިދާޅުވީ، ޕީޖީ އޮފީހުގެ މަސައްކަތުތައް ޑިޖިޓައިޒް ކުރެވިގެން ދިއުމުން އަދުލު އިންސާފު ގާއިމް ކުރުމަށް ހޭދަވާ މުއްދަތު އަވަސްކުރެވިގެންދާނެ ކަމަށެވެ. ހަމައެހެންމެ، އެ އޮފީހުގެ މަސައްކަތްތައް އިންތިޒާމުވެފައިވާ ގޮތުން، ތަހުގީގީ އިދާރައަކުން މައްސަލައެއްގެ ފައިލް އެ އޮފީހަށް ފޮނުވުމުން، ސްކޭން ކުރުމަށްފަހު ދައުވާކުރުމާ މެދު ގޮތެއް ނިންމަން ކުރަންޖެހޭ ދިރާސާތައް ކުރުމަށް އެތައް ވަގުތެއް ހޭދަވާ ކަމަށް އޭނާ ވިދާޅުވިއެވެ.
ނަމަވެސް ޕީޖީއޯ 2.0 އާއެކު ސްކޭން ކޮށްގެން، އިލެކްޓްރޯނިކް ފައިލް ޕްރޮސެކިއުޓަރާއި ހަމައަށް ދާއިރު 15 މިނެޓްގެ ތެރޭގައި ހުރިހާ މަސައްކަތެއް ކޮށް ނިންމާލެވޭނެ ކަމަށާއި މައްސަލައަކާ ގުޅުންހުރި ހުރިހާ މަސައްކަތެއް 6 ގަޑިއިރުގެ ތެރޭގައި އެއްކޮށް ނިންމާލެވޭނެ ކަމަށް އައްބާސް ވިދާޅުވިއެވެ. ކަން މިހެން އޮތުމުން ބޮޑެތި މައްސަލަތައް ވެސް އެންމެ ގިނަވެގެން 48 ގަޑިއިރު ތެރޭ ކޯޓަށް ފޮނުވާލެވޭނެ ކަމަށް އޭނާ ވިދާޅުވިއެވެ.
”އަޅުގަނޑުމެން ސްކޭން ކޮށްގެން، އިލެކްޓްރޯނިކް ފައިލް ޕްރޮސެކިއުޓަރާއި ހަމައަށް ދާއިރު 15 މިނެޓް ތެރޭ ހުރިހާ ކަމެއް ވެގެންދާނެ. އަޅުގަނޑުމެން އެންމެ އަވަހަށް ވެސް ވަގުތު ނަގާ މައްސަލަތައް 24 ގަޑިއިރު 48 ގަޑިއިރު، މައްސަލަ ދުވަހެއްގެ ދެބައިކުޅަ އެއްބައިން، އޭގެ މާނައަކީ 6 ގަޑިއިރު ތެރެއިން އެ މަސައްކަތް ކުރެވޭނެ. ބޮޑެތި މައްސަލަތައް ވެސް ގިނަވެގެން 48 ގަޑިއިރު ތެރޭ އަޅުގަނޑުމެންނަށް ކޯޓަށް ފޮނުވޭ ވަރަށް މަސައްކަތް ކުރާނެ.“ – އައްބާސް ވިދާޅުވިއެވެ.
އައްބާސް ވިދާޅުވި ގޮތުގައި މިކަމުގައި ބޭނުންކުރާ އޭއައި، ވަސީލަތަކީ އެ އޮފީހުން އަމިއްލައަށް ތައްޔާރުކުރާ ވަސީލަތަކަށްވުމުން އެ އޮފީހުގައި ހުންނަ މީހުންގެ ޒާތީ މައުލޫމާތު އެހެން ފަރާތަކަށް ލިބުމުގެ ފުރުސަތު ހަނިވާނެއެވެ. އަދި މިހާރު ވެސް އެ އޮފީހުގެ މައުލޫމާތަކީ ރައްކާތެރި ގޮތެއްގައި ބެލެހެއްޓޭ މައުލޫމާތު ކަމަށްވާއިރު މި މަސައްކަތާއެކު އެ މައުލޫމާތުތަކުގެ ރައްކާތެރިކަން މިހާރަށްވުރެ ބޮޑަށް ކަށަވަރު ކުރެވިގެންދާނެ ކަމަށް ވެސް އޭނާ ވަނީ ވިދާޅުވެފައެވެ.
ސަރުކާރުގެ ހަރަދުގައި ކުރިއަށްގެންދާ މި މަޝްރޫއަކީ 12 މިލިއަން ރުފިޔާ ބަޖެޓެއް ކަނޑައެޅިގެން 2 އަހަރުގެ ދުވަހުގެ މުއްދަތަށް ކުރިއަށް ގެންދެވޭ މަޝްރޫއެކެވެ. މި މަޝްރޫއު ނިމުމާއެކު ހިދުމަތްތައް ހޯދުމުގައި ރައްޔިތުން ހޭދަ ކުރާ ވަގުތު ބޮޑުތަނުން ކުޑަވާނެ ކަމަށް ޕީޖީ އޮފީހުން މައުލޫމާތެދެއެވެ.
