މާލޭގައި މިދިޔަ ޖޫން މަހު ބޭއްވި ޑައިމަންޑް ޖުބިލީ އިންޓަނޭޝަނަލް ފުޓްބޯޅަ މުބާރާތުގައި ރާއްޖެއާ ދެކޮޅަށް ކުޅުނު މެޗުގައި، ރެފްރީއަށް ހަމަލާދިން މައްސަލައިގައި ބަންގްލަދޭޝްގެ އަލް އަމީން 15 މެޗަށް ސަސްޕެންޑް ކުރުމަށް ފީފާގެ ޑިސިޕްލިނަރީ ކޮމިޓީން ނިންމައިފިއެވެ.
މިދިޔަ ޖޫން މަހުގެ 7 ވަނަ ދުވަހުގެ ރޭ ގައުމީ ފުޓްބޯޅަ ދަނޑުގައި ކުޅުނު މި މެޗު 1-1 އިން އެއްވަރުވެފައި ވަނިކޮށް، މެޗުގެ ފަހު ވަގުތުކޮޅު ބޮޑު ހަމަނުޖެހުމަކަށް ބަދަލުވީ ރެފްރީގެ ނިންމުންތަކާ މެދު ބަންގްލަދޭޝްގެ ބެންޗުން ހިތްހަމަނުޖެހުން ފާޅުކުރުމާ ގުޅިގެންނެވެ. އެގޮތުން މެޗުގެ އިތުރު ވަގުތުގައި ރާއްޖޭގެ ހަސަން އީނާޒަށް ބަންގްލަދޭޝްގެ ކުޅުންތެރިޔަކު ކުރި ޗެލެންޖަކާ ގުޅިގެން، އިންޑިއާގެ ރެފްރީ ސެންތިލްނާތަން ފައުލެއް ދިނުމުން ބަންގްލަދޭޝްގެ ކުޅުންތެރިން ވަރަށް ބޮޑަށް ރުޅިގަދަވި އެވެ.
މި ނިންމުމާ ދެކޮޅަށް ހިތްހަމަނުޖެހުން ފާޅުކުރުމުން، ބަންގްލަދޭޝްގެ ސީނިއާ ޓީމަށް ވެސް ކުޅޭ އަލް އަމީނަށް ރެފްރީ ވަނީ ދެވަނަ ރީނދޫ ކާޑާއެކު ރަތް ކާޑު ދައްކައި ދަނޑުން ފޮނުވާލައިފައެވެ. އެއާއެކު އޭނާ ވަނީ ރެފްރީގެ ގައިގައި ދެ ފަހަރަށް ޖަހައި ހަމަލާދީފައެވެ. އެ ވަގުތު އޭނާ ހުއްޓުވުމަށް އެ ޓީމުގެ އެހެން ކުޅުންތެރިން ވެސް މަސައްކަތް ކުރިއެވެ.
ފަހުން މެޗުގެ ކުޅުން އަލުން ފެށި ނަމަވެސް، އެންމެ ފަހު ވަގުތުގައި ބަންގްލަދޭޝްގެ އޭރިއާ ކައިރިން ރާއްޖޭގެ ޒުވާން ފޯވާޑް ނައްސާހް އިބްރާހިމް ނާސިރާ އެ ޓީމުގެ ކުޅުންތެރިން ކުރިމަތިލައި، ދެ ޓީމުގެ ދެމެދުގައި ވަނީ ބޮޑު ތަޅާފޮޅުމެއް ހިނގައިފައެވެ.
މި މައްސަލަތައް ބެލުމަށްފަހު ފީފާގެ ޑިސިޕްލިނަރީ ކޮމިޓީން ވަނީ އަލް އަމީން 15 މެޗަށް ސަސްޕެންޑް ކުރުމުގެ އިތުރުން، ބެންޗުގައި އިނދެ ރެފްރީގެ ނިންމުމާ ދެކޮޅަށް އަޑުގަދަކުރި އެ ޓީމުގެ މިރާޖުލް އިސްލާމް 2 މެޗަށް ސަސްޕެންޑް ކޮށްފައެވެ. އަދި ބަންގްލަދޭޝް ޓީމުގެ މެނޭޖަރު ޝަހީން ހަސަން ޖޫރިމަނާ ކުރުމަށް ވެސް ވަނީ ނިންމައިފައެވެ.
މި މެޗުގައި ހިނގައިދިޔަ ހަމަނުޖެހުންތަކާ ގުޅިގެން ރާއްޖޭގެ އެއްވެސް ކުޅުންތެރިއަކަށް ނުވަތަ އޮފިޝަލަކަށް ފީފާއިން އެއްވެސް ފިޔަވަޅެއް އެޅިކަން އަދި އެނގިފައެއް ނުވެއެވެ.
