”ޕޮއެޓްރީ ތެރަޕީ“ އަށް ދިވެހި ބަހުން ކިޔާނެ ނަމަކީ ”ޅެންފަރުވާ“ ކަމަށް ދިވެހި ބަހުގެ އެކެޑަމީއިން ކަނޑައަޅައިފިއެވެ.
ދިވެހިބަހާއި ސަގާފަތާ ގުޅޭ ވުޒާރާއިން ބުނީ ޕޮއެޓްރީ ތެރަޕީއަށް ކިޔާ ދިވެހި ނަމަކަށް ބަސް ކޮމިޓީއިން ނިންމާފައިވަނީ ”ޅެންފަރުވާ“ ކަމަށެވެ.
ދިވެހި ބަހުގައި ”ޅެންފަރުވާ“ގެ މާނައަކީ ބަލި މީހާގެ އިޙްސާސްތަކާއި އުދާސްތަކާއި ގުޅޭ ޅެންހެދުމާއި ކިޔުމާއި އަޑުއެހުމުގެ ތެރެއިން ނަފުސަށް ގެނެސްދޭ ތަސައްލީއެއްކަމަށް އެވުޒާރާއިން ބުނެއެވެ.
ބަސްކޮމެޓީން މި ނަން ފާސްކުރުމާއިއެކު މި ނަން މިހާރު ވަނީ ބަސްފޮތުގެ އޮންލައިން އިސްދާރުގައިވެސް ހިމަނުއްވައިފައެވެ.
ޅެންފަރުވާގެ ނަން ފާސްކޮށްފައިވާއިރު މިފަރުވާ ފެށުމަށްޓަކައި ކުރަންޖެހޭ ދިރާސާތައް ކުރުމަށް ގައުމީ ޔުނިވާސިޓީއާއެކު އެއްބަސްވުމެއްގައި ސޮއިކުރުމަށް ހަމަޖެހިފައިވާ ކަމަށް ދިވެހިބަހާ ބެހޭ ވުޒާރާއިން ބުނެއެވެ.
މި ފަހުމުނާމާގެ ދަށުން ޅެންފަރުވާއާ ބެހޭ ޢިލްމީ ދިރާސާތައް ކުރުމާއި ދިވެހި ޅެންތައް ބޭނުންކޮށްގެން ނަފުސީ ތަފާތު ބަލިތަކަށް ދެވިދާނެ ފަރުވާގެ މިންވަރާއި ތަފާތު ބަލިތަކަށް ފަރުވާ ދިނުމުގައި ގެންގުޅޭނެ އުސްލޫބުތަކުގެ މައްޗަށް ދިރާސާތައް ކުރެވިގެންދާނެއެވެ.
ދިވެހި ޅެންވެރިކަން ބޭނުންކޮށްގެން ނަފްސާނީ ހާލަތްތަކަށް ފަރުވާ ދެވޭތޯ ބެލުމުގެ ދިރާސާއެއް ކުރައްވާނެ ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އބްރާހީމް އިއުލާނު ކުރައްވާފައި ވަނީ މިއަހަރުގެ ޅެންވެރީންގެ ދުވަސް ފާހަގަކުރުމަށް ގދ.ތިނަދޫގައި ބޭއްވި ރަސްމިއްޔާތުގަ އެވެ.
