ވިލިމާލޭގައި ތަރައްގީކުރުމަށް ހަމަޖެހިފައިވާ ޗައިނާ މޯލްޑިވްސް ފްރެންޑްޝިޕް ހޮސްޕިޓަލުގެ މަސައްކަތް ވީހާވެސް އަވަހަކަށް ފެށުމަށްޓަކައި، ކޮންސްޓްރަކްޝަން މިނިސްޓްރީން އެދިފައިވާ ގޮތަށް ވަގުތީ ސައިޓްތައް ހަމަޖައްސައިދިނުމަށް މާލެ ސިޓީ ކައުންސިލްގެ ވިލިމާލެ ދާއިރާގެ ކައުންސިލަރު އިބްރާހިމް ސަމާހު ގޮވާލައްވައިފިއެވެ.
މާލެ ސިޓީ ކައުންސިލްގެ 5 ވަނަ ދައުރުގެ 13 ވަނަ ޖަލްސާގައި ވާހަކަދައްކަވަމުން ކައުންސިލަރު ސަމާހު ވިދާޅުވީ، ޗައިނާ މޯލްޑިވްސް ފްރެންޑްޝިޕް ހޮސްޕިޓަލަކީ ވިލިމާލޭގެ ރައްޔިތުންގެ އިތުރުން މުޅި މާލެ ސިޓީގެ ރައްޔިތުންނަށް ވެސް އޭގެ ސަބަބުން ވަރަށް ގިނަ ލާބަޔާއި މަންފާތައް ލިބިގެންދާނެ މަޝްރޫއެއް ކަމާމެދު އެއްވެސް ޝައްކެއް ނެތް ކަމަށެވެ. އަދި މި މަޝްރޫއުގެ އަމަލީ މަސައްކަތް ކުރިއަށް ގެންދިއުމަށްޓަކައި، މަސައްކަތް ކުރާނެ ވަގުތީ ހުސް ދެ ސައިޓެއް ހަމަޖައްސައިދިނުމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން ކައުންސިލުގައި އެދިފައިވާކަން އޭނާ ފާހަގަކުރެއްވިއެވެ.
ސަމާހު ވިދާޅުވީ އޭނާގެ އެންމެ ބޮޑު އެދުމަކީ ހޮސްޕިޓަލުގެ މަސައްކަތް ވީހާވެސް އަވަހަށް ފެށޭނެ ގޮތް ހެދުމަށްޓަކައި ވަގުތީ ސައިޓްތައް ކައުންސިލުން ހަމަޖައްސައިދިނުން ކަމަށެވެ. އަދި މިފަދަ މުހިންމު މަޝްރޫއުތައް ކާމިޔާބުކަމާއެކު ކުރިއަށް ގެންދެވޭނީ ސިޓީ ކައުންސިލުގެ ފުރިހަމަ އެއްބާރުލުން ސަރުކާރަށް ލިބިގެން ކަމަށާއި، ކައުންސިލުން އެއްބާރުލުން ދިނުމަކީ މަސައްކަތްތައް އަވަސްވެ ސަރުކާރަށް ވެސް ލިބޭނެ ބޮޑު ލުޔެއް ކަމަށް އޭނާ ވިދާޅުވިއެވެ.
މީގެއިތުރުން ސަމާހު ވިދާޅުވީ، ރައީސް ޑރ. މުޙައްމަދު މުޢިއްޒުގެ ސަރުކާރުން މިއުޅެނީ ނިމިދިޔަ އެމްޑީޕީގެ ސަރުކާރުން ކޮވިޑްގެ ދުވަސްވަރު ރައްޔިތުންގެ ނޭވާހޮޅިން ވައްކަންކޮށް ވެންޓިލޭޓަރު ދިރުވާލި ފަދަ ޖަރީމާއެއް ހިންގަން ނޫން ކަމަށެވެ. އަދި ރައްޔިތުންގެ ސިއްހަތާ ގުޅުންހުރި މިފަދަ މުހިންމު ކަންކަމުގައި ސަރުކާރުން ކުރާ މަސައްކަތްތަކަށް ޖެއްސުން ކުރުމަކީ ސީދާ ރައްޔިތުންނަށް ދެވޭ ވަރަށް ބޮޑު އަނިޔާއަކާއި ގެއްލުމެއް ކަމަށް އޭނާ ސިފަކުރެއްވިއެވެ.
ވެންޓިލޭޓަރުތަކުގެ ހަގީގަތް ސަމާހު ހާމަކުރެއްވުމާ ގުޅިގެން، ކައުންސިލުގައި ތިއްބެވި އިދިކޮޅު އެމްޑީޕީގެ ކައުންސިލަރުން ވަނީ މި މަޝްރޫއަށް ބޭނުންވާ ބިން ދިނުމަށް ވޯޓު ނުދޭނެ ކަމަށް ބުނެ، މި މަސައްކަތަށް ހުރަސްއަޅާނެ ކަމުގެ އިންޒާރު ދީފައެވެ. އެހެންނަމަވެސް، ސިޔާސީ ފިކުރު އެއްކިބާކޮށް، ރައްޔިތުންގެ ލާބައާއި މަންފާއަށް އިސްކަންދީގެން މި މަޝްރޫއު ކުރިއަށް ގެންދިއުމަށް އެއްބާރުލުން ދިނުމަށް ސަމާހު ވަނީ ތަކުރާރުކޮށް ގޮވާލައްވާފައެވެ.
