ދިވެހިރާއްޖޭގެ އެއްވެސް ޤައުމީ ކުޅިވަރު ޓީމެއްގައި ބައިވެރިވެވޭނީ ދުންފަތުގެ އިސްތިޢުމާލުކުރުމާ އެއްކޮށް ދުރުވެފައި ތިބި އެތުލީޓުންނަށް ކަމަށް ހެދުމުގެ ޓާގެޓު ހާސިލުކުރުމަށްޓަކައި ޚާއްޞަ އަމާޒުތަކެއް ކަނޑައެޅުމަށް ވަޒީރުންގެ މަޖިލީހުން ނިންމަވައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސަތުގައި 16 އޮގަސްޓު 2026 ވީ އާދީއްތަ ދުވަހު ބޭއްވެވި ވަޒީރުންގެ މަޖިލީހުގެ ޖަލްސާގައި، ދުންފަތާއި ނިކޮޓިންގެ ނުރައްކަލާމެދު ޢާންމުން ހޭލުންތެރިކުރުމަށާއި، ޖެނެރޭޝަނަލް ބޭން ތަންފީޒުކުރުމާ ގުޅުންހުރި މުހިންމު ނިންމެވުންތަކެއްގެ އިތުރުން ސަރުކާރުގެ އެކި މަޝްރޫޢުތަކާ ގުޅޭ މުހިންމު ނިންމެވުންތަކެއް ވަނީ ނިންމަވާފައެވެ.
މި ބައްދަލުވުމުގައި، ދުންފަތާއި ނިކޮޓިންގެ ނުރައްކަލާމެދު ހޭލުންތެރިކުރުމުގެ ޤައުމީ ކެމްޕޭން ކުރިއަށް ގެންދިއުމާއި، ސިނގިރޭޓުގެ އިމްޕޯޓު ޑިއުޓީ ރޭޓުތައް މުރާޖައާކުރުމާ ގުޅޭ ސަބް-ކޮމިޓީން ހުށަހެޅި މަޢުލޫމާތުތަކަށް ރިޢާޔަތްކުރައްވައި ގިނަ ކަންތައްތަކެއް ވަނީ ކަނޑައަޅުއްވާފައެވެ. އެގޮތުން، ސްކޫލް ނިޒާމުގެ ތެރެއިން ޖެނެރޭޝަނަލް ބޭން ތަންފީޒުކުރުމުގެ ކަންކަން މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓުން ކޯޑިނޭޓްކުރާ ގޮތަށް، މިނިސްޓްރީ އޮފް ހެލްތު، ފެމިލީ އެންޑް ވެލްފެއަރ އިން ކުރިއަށްގެންދިއުމަށާއި، މުޅި ރާއްޖެ ޝާމިލުވާ ގޮތަށް މަދަނީ ޖަމުޢިއްޔާތަކާއި، ރަށްރަށުގެ ޔޫތު އެސޯސިއޭޓުން އަދި ކުޅިވަރުގެ ދާއިރާގެ ބައިވެރިވުމާއެކު މި ކެމްޕޭން ފުޅާކުރުމަށް ވަނީ ނިންމަވާފައެވެ.
މީގެ އިތުރުން، އިޖުތިމާޢީ، ސަލާމަތީ އަދި އިޤްތިޞާދީ ދާއިރާއިން ވަޒީރުންގެ މަޖިލީހުން ނިންމެވި މުހިންމު ކަންކަމުގެ ތެރޭގައި:
- ގުރައިދޫ މަރުކަޒު ތަރައްޤީކުރުން: މާލެއަތޮޅު ގުރައިދޫގައި ހުންނަ ޚާއްޞަ އެހީއަށް ބޭނުންވާ މަރުކަޒަކީ ހުރިހާ ޚިދުމަތެއް ލިބޭ ”ސްޓޭޓް އޮފް ދި އާޓް“ މަރުކަޒަކަށް ހެދުމަށްޓަކައި އެތަން އަޕްގްރޭޑް ކުރުމުގެ މަސައްކަތް ކުރިއަށް ގެންދިއުން.
- ސިމްކާޑު ދޫކުރުމުގެ އުސޫލު ހަރުދަނާކުރުން: ޖަލުތަކަށް ވައްދާ ސިމްކާޑުތައް ރަޖިސްޓަރީކޮށްފައިވާ ފަރާތްތަކަށް ޤާނޫނީ ފިޔަވަޅު އެޅުމާއި، އަންސްކިލްޑް ބިދޭސީންނަށް ކޮންމެ މީހަކަށް އެންމެ ސިމްކާޑެއް ދޫކުރާ ގޮތަށް ހަމަޖެއްސުން. އަދި ސިމް ގެއްލިގެން ނުވަތަ ހަލާކުވެގެން އިތުރު ސިމެއް ދޫކުރެވޭނީ ފުލުހުން މެދުވެރިކޮށް ކަނޑައެޅޭ އުސޫލަކުން ކަމަށް ހަމަޖެއްސުން.
- ބަންދު މީހުންގެ އަދަދު މަދުކުރުން: އެކި މައްސަލަތަކުގައި ތަޙުޤީޤަށް ހައްޔަރުކޮށް، ޙުކުމެއް ކުރުމެއް ނެތި ބަންދުގައި ތިބޭ މީހުންގެ އަދަދު އެންމެ މަދު ޤައުމަކަށް ރާއްޖެ ހެދުމަށް ފިޔަވަޅުތައް އެޅުން.
- ކޮޕަރ ވަޔަރު ވަގަށް ނެގުން ހުއްޓުވުން: ބޮޑު އަގުގައި އެކްސްޕޯޓްކުރުމަށްޓަކައި ތަންތަނުގައި އަޅާފައި ހުންނަ ކޮޕަރ ވަޔަރުތައް ބުރިކޮށްގެން ވަގަށް ގެންދާ މައްސަލައަށް އަވަސް ޙައްލެއް ހޯދުން.
- ވައިގެ ދަތުރުފަތުރުގެ ފެއަރ ކުޑަކުރުން: އައިލެންޑް އޭވިއޭޝަން ސަރވިސަސް ލިމިޓެޑް (އައި.އޭ.އެސް) އިން ވައިގެ ދަތުރުފަތުރުގެ ޓިކެޓަށް ފަތުރުވެރިން އަތުން ނަގާ ފެއަރ މުރާޖަޢާކޮށް، އެ އަގު ކުޑަކުރުން ހިމެނެއެވެ.
ވަޒީރުންގެ މަޖިލީހުން ނިންމެވި މި ނިންމެވުންތަކަކީ ދިވެހި މުޖުތަމަޢުގެ ޞިއްޙީ ރައްކާތެރިކަމާއި، ޤައުމީ ސަލާމަތާއި، އަދި އިޤްތިޞާދީ ދުޅަހެޔޮކަން ކަށަވަރުކުރުމަށްޓަކައި އެޅުއްވި ވަރަށް މުހިންމު ފިޔަވަޅުތަކެކެވެ.
