ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅާ އެއްގޮތަށް ވާނުވާ ބަންދުގައި ތިބޭ މީހުންގެ އަދަދު އެންމެ މަދު ގައުމަކަށް ރާއްޖެ ހެދުމަށް ކުރަންޖެހޭ ހުރިހާ މަސައްކަތްތަކެއް ކުރުމަށް ވަޒީރުންގެ މަޖިލީހުން ނިންމައިފިއެވެ.
މިކަމާ ގުޅިގެން ރައީސުލްޖުމްހޫރިއްޔާގެ އޮފީހުން ބުނެފައިވަނީ، އެކި މައްސަލަތަކުގައި ތަހުގީގަށް ހައްޔަރުކޮށް، ހުކުމެއް ކުރުމެއް ނެތި ބަންދުގައި ތިބޭ މީހުންގެ އަދަދު އެންމެ މަދު ގައުމަކަށް ރާއްޖެ ހެދުމަށްޓަކައި ކުރައްވަންޖެހޭ ހުރިހާ މަސައްކަތެއް ކުރުމަށް ވަޒީރުންގެ މަޖިލީހުން ނިންމަވާފައިވާ ކަމަށެވެ.
ޝަރީއަތުގެ މަރުހަލާ ނިމެންދެން ބަންދުގައި ތިބޭ މީހުން ނުވަތަ ވާނުވާ ބަންދުގައި ތިބޭ މީހުންގެ އަދަދު ދުވަހެއް ދުވަހަކަށް އިތުރުވުމަކީ އެތައް ބައެއްގެ ކަންބޮޑުވުން އޮތް މައްސަލައެކެވެ. ގިނަ ދުވަސްވީ މި މައްސަލައަށް ހައްލެއް ހޯއްދަވައިދެއްވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މީގެ ކުރިން ވެސް ދެއްވައިފައެވެ. މީގެ އިތުރުން މި މައްސަލަ ހައްލުކުރުމަށް އަމަލީ ގޮތުން ގިނަ މަސައްކަތްތަކެއް މި ސަރުކާރުގައި ކުރެވިފައިވެއެވެ.
އެގޮތުން ޝަރުއީ ދާއިރާއަށް ސަރުކާރުތަކުން ފޯރުވަމުން އައި ނުފޫޒު ހުއްޓުމަކަށް ގެނައުން ހިމެނެއެވެ. ސަރުކާރުން މި މަސައްކަތްކޮށްފައިވަނި ޝަރުއީ ދާއިރާއަށް ވަކި ބަޖެޓެއް ކަނޑައަޅައިގެންނެވެ.
ރައީސް މުޢިއްޒު މީގެ ކުރިން ވަނީ، ވާނުވާ ބަންދުގައި އަހަރަކަށްވުރެ ގިނަ ދުވަސްވެފައިވާ މީހުންގެ މައްސަލަތައް ވަކި ގޮތަކަށް ނިންމުމަށްޓަކައި ބަންޑާރަ ނައިބުގެ އޮފީހުން އަދާކުރަންޖެހޭ އެންމެހައި މަސްއޫލިއްޔަތުތައް ފުރިހަމައަށް އަދާކުރައްވާނެ ކަމުގެ ޔަގީންކަން ދެއްވައިފައެވެ. އަދި ބަންދުގައި ތިބޭ މީހުންގެ މައްސަލަތަކަށް އިންސާފުވެރި ހައްލެއް ހޯދައިދިނުމަށް މި ސަރުކާރުން ވަރަށް ބޮޑު އަހައްމިއްޔަތުކަމެއްދީގެން މަސައްކަތް ކުރާނެ ކަމަށް ވެސް އެމަނިކުފާނު ވަނީ އެކި ފަހަރުގެ މަތިން ވިދާޅުވެފައެވެ.
