ރާއްޖެއަށް މިހާރު ކުރަމުންދާ ވިއްސާރަ އިތުރަށް ގޯސްވެ ފުވައްމުލަކާ އަދި އައްޑޫ ސިޓީއަށް ނެރުނު އޮރެންޖު އެލާޓު ދަންމައިލައިފިއެވެ.
އެ ސަރަހައްދަށް ވައި ވަރަށް ގަދަވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން އޮރެންޖު އެލާޓް ފުރަތަމަ ނެރެފައި ވަނީ މިއަދު މެންދުރުފަހު 3:00 އިން ފެށިގެން އިރުއޮއްސި 7:00 ޖެހުމާ ހަމައަށެވެ. އެފަހުން ވަނީ މިރޭގެ 11:00 އާ ހަމައަށް އެލާޓުގެ ވަގުތު އިތުރުކޮށްފައެވެ.
މެޓު އޮފީހުން ބުނީ، މިރޭގެ އެވަގުތާ ހަމައަށް ގަޑިއަކު 34 މޭލާއި 40 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވޭ ކަމަށާއި ވިލާގަނޑުގައި ގަޑިއަކު 55 މޭލަށް ވައި ގަދަވާނެ ކަމަށް ލަފާކުރެވޭ ކަމަށެވެ. އެ ސަރަހައްދުގެ ކަނޑުތައް ވަރަށް ގަދަވާނެ ކަމަށް ލަފާކުރެވޭ ކަމަށް ވެސް އެ އިދާރާއިން ބުނެއެވެ.
މެޓު އޮފީހުން ވަނީ ބޯކޮށް ވާރޭވެހި، ވައި ގަދަވެ އަދި ކަނޑުތައް ގަދަވެ އުދައަރާނެ ކަމަށް ލަފާކުރެވޭތީވެ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސްކޮށްފައެވެ.
