ހދ. ނޭކުރެންދޫގައި ފެނާއި ނަރުދަމާ ނިޒާމު ގާއިމުކުރުމުގެ އަމަލީ މަސައްކަތް އެއްކޮށް ނިންމާލައިފިއެވެ.
މިކަމާ ގުޅިގެން ހައުސިންގ މިނިސްޓްރީން ބުނެފައިވަނީ، އެ ރަށު ފެނާއި ނަރުދަމާގެ ނިޒާމު ޓެސްޓުކޮށް ކޮމިޝަންކުރުމުގެ މަސައްކަތް ވެސް ކާމިޔާބުކަމާއެކު ނިންމާލާފައިވާ ކަމަށެވެ. މިއީ އޯޕެކް ފަންޑް ފޯރ އިންޓަނޭޝަނަލް ޑިވެލޮޕްމެންޓްގެ ލޯނު އެހީއާއި ދިވެހި ދައުލަތުގެ ބަޖެޓުން ހަރަދުކޮށްގެން، ހައުސިންގ މިނިސްޓްރީން ކުރިއަށްގެންދިޔަ މަޝްރޫއެކެވެ.
ސަރުކާރުން މި މަޝްރޫއުގެ އަމަލީ މަސައްކަތް ހަވާލުކޮށްގެން ކުރިއަށްގެންގޮސްފައިވަނީ އަލްޓެކް މޯލްޑިވްސް ޕްރައިވެޓް ލިމިޓެޑާއި ރަޝީދު ކާޕެންޓްރީ އެންޑް ކޮންސްޓްރަކްޝަން ލިމިޓެޑްގެ ޖޮއިންޓް ވެންޗަރއާއެވެ. ނޭކުރެންދޫގައި ގާއިމުކުރި ފެނާއި ނަރުދަމާގެ ނިޒާމު ޓެސްޓުކޮށް ކޮމިޝަންކުރުމުގެ މަސައްކަތުގައި ހައުސިންގ މިނިސްޓްރީގެ ޓެކްނިކަލް މުވައްޒަފުންގެ އިތުރުން، މަޝްރޫޢުގެ ކޮންޓްރެކްޓަރާއި، ފެނަކަ ކޯޕަރޭޝަން އަދި އެ ރަށު ކައުންސިލުން ބައިވެރިވެފައިވެއެވެ.
ހދ. ނޭކުރެންދޫ ފެނާއި ނަރުދަމާ ނިޒާމު ޤާއިމުކުރުމުގެ މަޝްރޫޢު pic.twitter.com/dmshiYkQZH
— Ministry of Infrastructure, Housing and Urban Dev. (@MIHUDmv) August 17, 2026
ހައުސިންގ މިނިސްޓްރީން ހާމަކޮށްފައިވާ ގޮތުގައި، މި މަޝްރޫއުގެ ދަށުން ފެން ޓެސްޓުކުރެވޭ އިކްއިޕްމަންޓްތަކާއެކު ލެބޯޓަރީއަކާއި އޮފީސް ޖާގައެއް ގާއިމުކުރެވިފައިވެއެވެ. ހަމައެހެންމެ، ތިމާވެއްޓާ ރައްޓެހި ގޮތަށް ހިދުމަތް ދިނުމަށްޓަކައި 30 ކިލޯވޯލްޓްގެ ސޯލަރ ޕެނަލް ވެސް ވަނީ ހަރުކޮށްފައެވެ. އަދި، އާރުއޯ ޕްލާންޓުގެ އިމާރާތެއް ބިނާކޮށް، 2 ބޯހޯލް ތޮރުފައި، 30 ޓަނުގެ 2 އާރުއޯ ޕްލާންޓާއި، 135 ޓަނުގެ ބޯފެން ރައްކާކުރާ 2 ތާނގީ ވެސް ވަނީ ބަހައްޓާފައިވެއެވެ.
މީގެ އިތުރުން، 13.1 ކިލޯ މީޓަރުގެ ފެނުގެ ވިއުގައަކާއި، 10.4 ކިލޯމީޓަރުގެ ނަރުދަމާ ވިއުގަ އަޅާފައިވާއިރު، ސީ އައުޓް ފޯލް އެޅުމުގެ އިތުރުން، ނަރުދަމާ ނިޒާމު ގުޅުވުމަށްޓަކައި ގޭބީސީތަކާއި އެހެނިހެން އިމާރާތްތަކުގެ ތެރޭގައި ޗެކްޕިޓް ބެހެއްޓުމާއި، ފެން މީޓަރުތައް ބެހެއްޓުމުގެ މަސައްކައްތައްވެސް ވަނީ އެއްކޮށް ނިންމާލާފައެވެ.
މި މަޝްރޫއާއެކު ނޭކުރެންދޫގެ ރައްޔިތުންނަށް ދިމާވެފައިވާ ސާފު ފެނާއި ނަރުދަމާގެ ނިޒާމުގެ މައްސަލައަށް ދާއިމީ ހައްލެއް ލިބިގެންދާނެއެވެ.
