ރާއްޖޭގައި މަސައްކަތްކުރާ ބޭރުގެ ކޮންޓްރެކްޓަރުންގެ އަތުން ނަގާ ވިތު ހޯލްޑިންގ ޓެކްސް ދެގުނައަށް ބޮޑުކުރުމަށް ގާނޫނަށް އިސްލާހު ގެންނަން ހުށަހެޅި ބިލު މުޅި މަޖިލީހުގެ ކޮމިޓީން މިއަދު ފާސްކޮށްފިއެވެ.
ސަރުކާރުގެ ފަރާތުން ރައްޔިތުންގެ މަޖިލީހަށް މި ބިލު ހުށަހެޅުއްވީ މަތިވެރި ދާއިރާގެ މެންބަރު ޙަސަން ޒަރީރެވެ. މި ބިލު މަޖިލީހަށް ބަލައިގަނެ ދިރާސާ ކުރުމަށް މުޅި މަޖިލިސް ކޮމީޓީއަށް ފޮނުވީ އިއްޔެއެވެ. ބިލު ދިރާސާކުރުމަށް މިއަދު ބޭއްވި ކޮމިޓީ ބައްދަލުވުމުގައި ބިލު ހުށަހަޅާފައިވާ ގޮތަށް ބަދަލެއް ނުގެނެސް ބިލު ފާސްކުރަން ހުށަހެޅުއްވީ، އިނގުރައިދޫ ދާއިރާގެ މެންބަރު އިބްރާހިމް ފަލާޙެވެ. އޭނާގެ މި ހުށަހެޅުއްވުމަށް ތާއީދުކުރެއްވީ ހޮޅުދޫ ދާއިރާގެ މެންބަރު ޢަބްދުއްސައްތާރު މުޙައްމަދެވެ.
މި ބިލު ފާސްކުރީ ކޮމިޓީ ބައްދަލުވުމުގައި ބައިވެރިވި 70 މެންބަރުންގެ ތެރެއިން 64 މެންބަރުންގެ އިއްތިފާގުންނެވެ. މި ބިލު ފާސްކުރަން އިދިކޮޅު އެމްޑީޕީގެ މެންބަރުން ވޯޓު ދެއްވައިފައެއް ނުވެއެވެ.
މި ބިލުގެ މައިގަނޑު މަގުސަދަކީ ރާއްޖޭގައި ކޮންސްޓްރަކްޝަން މަޝްރޫއުތަކުގެ ކޮންޓްރެކްޓްތަކަށް ވާދަކުރުމުގައި ދިވެހި ކޮންޓްރެކްޓަރުން، ބޭރުގެ ކޮންޓްރެކްޓަރުންނާ ހަަމަހަމަ ވާދަވެރި މާހައުލެއް އުފެއްދުމެވެ. މި ބިލުގައި، ވިތުހޯލްޑިންގ ޓެކްސް 5 އިންސައްތައިން 10 އިންސައްތައާއި ހަމައަށް ބޮޑުކުރުމަށް ވަނީ ހުށަހަޅައިފައެވެ. އަދި މި ބަދަލާއެކު ދައުލަތުގެ އާމްދަނީއަށް އަހަރެއްގެ މައްޗަށް އިތުރު 251 މިލިއަން ރުފިޔާ ލިބޭނެ ކަމަށް ވެސް ލަފާކޮށްފައިވެއެވެ.
ވިތު ހޯލްޑިންގ ޓެކުހަކީ ބޭރުގެ ކޮންޓްރެކްޓަރުންނަށް ދިވެހި ވިޔަފާރިތަކުން ފައިސާ ދައްކާ ނަަމަ، އެ ދައްކަންޖެހޭ އަގުގެ ތެރެއިން އުނިކޮށްގެން ނަގާ ޓެކުހެކެވެ. މި ފައިސާ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އަށް ދައްކާނީ ދިވެހި ކުންފުނިތަކުންނެވެ.
