ނިމިދޔަ އެމްޑީޕީ ސަރުކާރުގެ ފަސް އަހަރުގެ ތެރޭގައި ސަރުކާރު ހިއްސާވާ ކުންފުނިތަކަށް 18،053 މުވައްޒަފުން ނަގާފައިވާ ކަމަށާއި ނަމަވެސް މި ސަރުކާރުން ކުންފުނިތަކަށް ނެގި މުވައްޒަފުންގެ އަދަދަކީ 4،938 ކަމަށް ފިނޭންސް މިނިސްޓަރު ޙަސަން ޒަރީރު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވަނީ، ނިމިދިޔަ އެމްޑީޕީ ސަރުކާރުން އެކި ދުވަސްވަރު ކުންފުނިތަކަށް ނެގި މުވައްޒަފުންގެ އަދަދުތައް ހާމަކުރައްވައިފައެވެ. އެގޮތުން 2018 ވަނަ އަހަރު ކުންފުނިތަކުގައި 18،676 މުވައްޒަފުން ތިބި ކަމަށާއި، ނަމަވެސް 2019 ވަނަ އަހަރުން ފެށިގެން 2023 ވަނަ އަހަރާއި ހަމައަށް އެ އަދަދު 100 އިންސައްތަ އިތުރުވެފައިވާ ކަމަށް އޭނާ ވިދާޅުވިއެވެ.
މިނިސްޓަރު ޒަރީރު ވިދާޅުވީ އެ މުއްދަތުގެ ތެރޭގައި ސަރުކާރު ހިއްސާވާ ކުންފުނިތަކުގައި 36،729 މުވައްޒަފުން ތިބި ކަމަށެވެ. އަދި 2024 ވަނަ އަހަރުން ފެށިގެން މިހާތަނަށް މި ސަރުކާރުން ކުންފުނިތަކަށް ނަގާފައިވާ 4،938 މުވައްޒަފުންނާ އެކު މިހާރު ތިބި މުވައްޒަފުންގެ ޖުމުލަ އަދަދަކީ 41،667 ކަަމަށް ވެސް އޭނާ ވިދާޅުވިއެވެ.
”މިދިޔަ މަހުގެ ނިޔަލަށް މުވައްޒަފުން ތިބި އަދަދަކީ 41،667، އެހެންވީމާ 2024 ވަނަ އަހަރުން ފެށިގެން މިހާތަނަށް ވެއްދިފައިވާ މުވައްޒަފުންގެ އަދަދަކީ 4،938 މުވައްޒަފުން، މިއީ 13 ޕަސެންޓުގެ އިންކްރިމެންޓެއް،“ – މިނިސްޓަރު ޒަރީރު ވިދާޅުވިއެވެ.
މިނިސްޓަރު ވިދާޅުވީ ކުރިއަރާފައިވާ ގައުމުތަކެކޭ އެއްފަދައިން ރާއްޖޭގެ އިގުތިސޯދު ހަރުދަނާ ކުރަން ބޭނުން ނަމަ، މުވައްޒަފުންގެ އަދަދު މަދުކުރުމަށް ކުންފުނިތައް ރައިޓް ސައިޒްކުރުމަކީ ކޮންމެހެން ކުރަންޖެހޭ ކަމެއް ކަމަށެވެ.
ސިޔާސީ ފިކުރަށް ބަލައިގެން މުވައްޒަފުން ވަކިކުރަމުންދާ ކަމަށް ބުނެ އިދިކޮޅު އެމްޑީޕީން ދައްކަމުން އަންނަ ވާހަކަތަކަށް ރައްދުދެއްވަމުން މިނިސްޓަރު ޒަރީރު ވިދާޅުވީ، ސަރުކާރު ހިއްސާވާ ކުންފުނިތައް ރައިޓް ސައިޒް ކުރުމުގެ މަސައްކަތް ކުރިއަށްގެންދާއިރު އެއްވެސް މުވައްޒަފެއްގެ ސިޔާސީ ފިކުރަށް ނުވަތަ ކުލައަކަށް ނުބަލާނެ ކަމަށާއި، އެ މަސައްކަތް ކުރިއަށްގެންދާނީ އިންސާފުވެރިކަމާއެކުގައި ކަމަށެވެ.
ސަރުކާރު ހިއްސާވާ ކުންފުނިތަކުގެ މުވައްޒަފުންގެ އަދަދު 33 އިންސައްތަ މަދުކުރުމަށް މިދިޔަ އޭޕްރީލް މަހުގެ ތެރޭގައި ޕީސީބީން ވަނީ އަންގައިފައެވެ. އަދި އެ މަސައްކަތް ތިން މަސް ދުވަހުގެ ތެރޭގައި ނިންމުމަށް ވެސް ކުންފުނިތަކަށް އަންގާފައިވާކަން ފާހަގަކޮށްލަންޖެހެއެވެ.
ކުރީ ސަރުކާރުން އެވަރަށް މުއައްޒަފުން ނަގައިފަ އޮއްވަ މިސަރކާރުން 4ހާހަށްވުރެވިނަ މުއައްޒަފު ނެގީ ކީއްވެ ކުންފުނި ތަކަކީ އަންނަ ކޮންމެ ސަރުކާރަކުން މީހުން ނަގަން އޮތްތަނެއްތަ