ރާއްޖޭގެ ކޯޓުތަކުގެ ނިންމުންތައް އެއް ޕްލެޓްފޯމަކުން ފަސޭހައިން ބަލާލެވޭގޮތަށް ފަރުމާކޮށްފައިވާ ހާއްސަ ވެބްސައިޓު ”ސަރިޔަތް“ ލޯންޗްކޮށްފިއެވެ.
މި ވެބްސައިޓަކީ ހައި ކޯޓުގެ ފަނޑިޔާރު ޢަބްދުލްމާނިއު ހުސައިން ފަރުމާކުރައްވާފައިވާ ވެބްސައިޓެކެވެ. މި ވެބްސައިޓުން ހައި ކޯޓާއި ސުޕްރީމް ކޯޓުގެ 6،000 އެއްހާ ނިންމުން މިހާރު ވެސް ފެންނަން އެބަހުއްޓެވެ. މި ވެބްސައިޓުގައި ވަކި ހާދިސާއެއް ސާޗް ކުރުމުން އެކަމާ ގުޅޭ ނިންމުންތަކާ ގުޅޭ މައުލޫމާތު ހޯދާލެވޭނެއެވެ.
ހަމައެހެންމެ، މަތީ ކޯޓުތަކުގެ ވަކިވަކި ފަނޑިޔާރުންނަށް އަމާޒުކޮށްގެން، އެ ފަނޑިޔާރުން ނިންމަވާފައިވާ ނިންމެވުންތައް ވެސް ވަކިން މި ވެބްސައިޓުން ބަލައިލެވޭނެއެވެ. އަދި ކޮންމެ މައްސަލައެއް ނިންމުގައި އެ މައްސަލައެއްގައި ކަނޑައަޅާފައިވާ ގާނޫނީ އުސޫލުތައް ކުރުކޮށް ފެންނަން ހުންނައިރު މައްސަލަތަކުގެ ބާވަތްތަކާއި ގާނޫނީ އުސޫލުތަކާއި ކޯޓުތަކުގެ ނިސްބަތުން ވެސް ވަކިވަކިން ނިންމުންތައް ބެލެން ހުންނާނެއެވެ.
މި ވެބްސައިޓުގައި މި ވަގުތު ފެންނަން ހުރީ ސުޕްރީމް ކޯޓާއި ހައި ކޯޓުގެ ނިންމުންތައް އެކަނި ނަމަވެސް ވަރަށް އަވަސް މުސްތަގުބަލެއްގައި ދަށު ކޯޓުތަކުގެ ނިންމުންތައް ވެސް ޝާއިއު ކުރެވިގެންދާނެއެވެ.
މި ވެބްސައިޓްގެ އެންމެ ފާހަގަކޮށްލެވޭ އެއް ކަމަކީ އާޓިފިޝަލް އިންޓެލިޖެންސް ނުވަތަ އޭއައިގެ އެހީގައި ސުވާލެއް ކުރުމުން ނުވަތަ ހާދިސާއެއް ބުނެދިނުމުން، އެކަމަކާ ގުޅޭ ގާނޫނީ އުސޫލުތައް ޑޭޓާބޭސްއިން ހޯދައިދީ ކިޔައިދިނުމުގެ ގާބިލުކަން ލިބިގެންވުމެވެ. ހަމައެހެންމެ ޑޮކިއުމަންޓް އަޕްލޯޑްކޮށްގެން ދިރާސާކުރުމުގެ އިތުރުން އޭއައިގެ އެހީގައި ގާނޫނީ ޑްރާފްޓިންގ ވެސް މި ވެބްސައިޓުން ހެދޭނެއެވެ.
