އޮމާންގެ ދެކުނުގެ ޖަޒީރާއެއް ކައިރިއަށް ބީހިފައިވާ ”ކެރޮލައިން ބެޒެންގީ“ ނަމަކަށް ކިޔާ ތެޔޮ ބޯޓުން ބޭރުވި ތެޔޮގަނޑު ޢަރަބި ކަނޑަށް ފެތުރި، އޮމާންގެ މައި ފަސްގަނޑުގެ އައްސޭރިފަށުގެ 40 ކިލޯމީޓަރުގެ ސަރަހައްދަކަށް އޭގެ ނޭދެވޭ އަސަރުކޮށްފިއެވެ. އޮމާންގެ އެންވަޔަރަންމަންޓް އޮތޯރިޓީން ވަނީ ރަސް މަދުރަކާ ސަރަހައްދުގެ ގޮނޑުދޮށްތަކަށް ތެޔޮ ފެތުރުމާ ގުޅިގެން ކުއްލި ނުރައްކަލުގެ ފިޔަވަޅުތައް ވަރުގަދަކޮށްފައެވެ. މި ބޯޓަކީ ގާތްގަނޑަކަށް އެއް މިލިއަން ފީޕާގެ ސާމް ތެޔޮ އުފުލަމުންދަނިކޮށް، ގޮވުމެއް ގޮވައި، މިނިވަން ދަތުރުފަތުރަށް ހުރަސްއެޅި، ޖޫން މަހުގެ ތެރޭގައި ފަރަކަށް ބީހުނު ބޯޓެކެވެ.
ސެޓެލައިޓް މައުލޫމާތުތަކުން ދައްކާ ގޮތުގައި، ކަނޑަށް ފެތުރިފައިވާ ތެޔޮގަނޑުގެ ބޮޑުމިން 390 އާއި 1,700 އަކަކިލޯމީޓަރާ ދެމެދުގެ ސަރަހައްދަކަށް ފެތުރިފައިވެއެވެ. ގަދަ ވަޔާއި 4 މީޓަރުގެ އުސް ރާޅުތަކުގެ ސަބަބުން، 17 ޑިގްރީއަށް އަރިއަޅާލާފައިވާ ބޯޓުން ބާކީ ހުރި ތެޔޮ ނެގުމުގެ މަސައްކަތަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
މި ހާދިސާގެ ސަބަބުން އެ ސަރަހައްދުގައި އުޅޭ އަރަބި ކަނޑުގެ ބޮޑުމަހާއި، ވެލާ އަދި މުރަކައިގެ ފަރުތަކަށް ބޮޑެތި ގެއްލުންތަކެއް ލިބުމުގެ ބިރު ވަނީ ބޮޑުވެފައެވެ. އޮމާން ސަރުކާރުން ވަނީ ދުޤުމް އަދި މަސީރާ ރަށުގައޖ ތެޔޮ ސާފުކުރުމުގެ ޚާއްޞަ ސެންޓަރުތަކެއް ޤާއިމްކޮށް، ގޮނޑުދޮށްތައް ސާފުކުރުމުގެ މަސައްކަތް ފަށާފައެވެ.
