ބޭރު ކޮންޓްރެކްޓަރުންނަށް ދޭ ފައިސާއިން ނަގާ ޓެކްސް ބޮޑުކުރުމުން ދިވެހި ކޮންޓްރެކްޓަރުންނާ އޮންނަ ތަފާތުތައް ނެތި ހަމަހަމަކަން ގާއިމް ކުރެވޭނެ ކަމަށް ކިނބިދޫ ދާއިރާގެ މެންބަރު އަލީ އަޝްރަގު ވިދާޅުވެއްޖެއެވެ.
ރާއްޖޭގައި ހިންގާ ކޮންސްޓްރަކްޝަން މަޝްރޫއުތަކުގައި ހިމެނޭ ބޭރުގެ ކޮންޓްރެކްޓަރުންނަށް ދޭ ފައިސާއިން ނަގާ ވިތުހޯލްޑިން ޓެކްސް 10 ޕަސެންޓަށް އިތުރު ކުރަން އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ރައްޔިތުންގެ މަޖިލީހުގެ މިއަދުގެ ޖަލްސާއަށް މަތިވެރި ދާއިރާގެ ޕީއެންސީ މެންބަރު ހަސަން ޒަރީރު ހުށަހެޅުއްވި ބިލުގެ ބަހުސްގައި އަޝްރަގު ވިދާޅުވީ ރާއްޖޭގެ ޓެކްސް ނިޒާމުގައި ބޮޑު އުނިކަމެއް އޮންނަތާ އެތައް ޒަމާނެއް ވެއްޖެ ކަމަށެވެ.
”ދިވެހި ރާއްޖޭއިން ބޭރުގެ ކުންފުނިތަކުން ދިވެހިރާއްޖެއަށް އައިސް އެތައް މިލިއަން ޑޮލަރުގެ ފައިދާއެއް ނަގައިގެން އެ ދަނީ ރާއްޖެއިން ބޭރަށް އެ ފައިސާ ހިފައިގެން. މި ބޭފުޅުން ޕްރޮޖެކްޓް ނިންމުމަށް ފަހު ޓެކްސް ދައްކާ ހިސާބަށް އައުމުން އޮފްޝޯ ހަރަދުތައް ބޮޑުކޮށް ދައްކައި ޓެކްސް ސުމަކަށް ހަދައި. އެހެންނަމަވެސް ދިވެހި ކުންފުނިތަކުން ދަނީ ބަރާބަރަށް ޓެކްސް ދައްކަމުން“ އަޝްރަގު ވިދާޅުވިއެވެ.
އަޝްރަގު ވިދާޅުވީ، އެ ބިލް އައުމުން އެ ނާއިންސާފު މުޅިން ނެތިގެންދާނެ ކަމަށެވެ.
”އަޅުގަނޑަށް ވަރަށް ސާފުކޮށް ބުނަން ކެރޭ މި ބިލަކީ ދިވެހި ކުދި ވިޔަފާރިތަކުން ލޯ ލާރިއެއް ނަގާނެ ބިލެއް ނޫން.“ އަޝްރަގު ވިދާޅުވިއެވެ.
އަޝްރަގު ވިދާޅުވީ، އެމްޑީޕީން މި ބިލާ ދެކޮޅު ވަނީ، ޕާޓީގެ ލީޑަޝިޕުން ޕީއެންސީން ހުށަހަޅާ އެއްވެސް ބިލަކަށް ތާއީދު ނުކުރަން އެންގުމުން ކަމަށާއި އެ ބިލަކީ ރަނގަޅު ބިލެއްކަން އެމްޑީޕީ މެންބަރުންނަށްވެސް ސާފުވެވަޑައިގަންނަވާ ކަމަށެވެ.
ގާނޫނަށް މި އިސްލާހު ގެނައުމުގެ ބޭނުމެއް ކަމަށް ބިލުގައި ބުނެފައި ވަނީ، ރާއްޖޭގައި ހިންގާ ކޮންސްޓްރަކްޝަން މަޝްރޫއުތަކުގެ ކޮންޓްރެކްޓްތަކަށް ވާދަ ކުރުމުގައި، ދިވެހި ވިޔަފާރިތަކާއި ވަޒަންވެރި ވެފައިނުވާ ކޮންޓްރެކްޓަރުންނާ ދެމެދު ހަމަހަމަ އަދި ވާދަވެރި މާހައުލެއް ގާއިމް ކުރުން ކަމަށެވެ.
