އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިޢުލާނު ކުރައްވާފައިވާ އެ ޕާޓީގެ ކުރީގެ ރައީސް ޢަބްދުﷲ ޝާހިދަށް، ރާއްޖޭގެ އެންމެ ބޮޑު ދެ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާއިންގެ ފުރިހަމަ ތާއީދު އޮތްކަން ހާމަކުރައްވައިފިއެވެ.
މާލެ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާ ޢާއިޝަތު ރީޝާ އަދި އައްޑޫ ސިޓީގެ އެ ކޮމިޓީގެ ރައީސާ ފާތިމަތު ހިޖުރާ ވަނީ ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި ޝާހިދަށް ފުރިހަމައަށް ތާއީދުކުރައްވާނެ ކަމަށް ވިދާޅުވެފައެވެ.
މި ދެ ބޭފުޅުންގެ އިތުރުން މާލެއާއި އައްޑޫ ސިޓީ ކައުންސިލްގެ ބައެއް މެންބަރުން ވެސް ވަނީ ޝާހިދަށް ތާއީދުކުރައްވާކަން ހާމަކުރައްވާފައެވެ.
މި ތާއީދު ހާމަކުރައްވާފައިވަނީ ޝާހިދު އައްޑޫ ސިޓީއަށް ކުރެއްވި ދަތުރުފުޅަކާ ދިމާކޮށެވެ. އޭނާ ވަނީ މިދިޔަ ހުކުރު ދުވަހު އައްޑޫ ސިޓީއަށް ވަޑައިގެން، އެ ސިޓީގެ އެމްޑީޕީގެ އިސް ފަރާތްތަކާއި، ކައުންސިލަރުންގެ އިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާ ބައްދަލުކުރައްވާފައެވެ.
އަންނަ 2028 ވަނަ އަހަރު ބާއްވާ ރިޔާސީ އިންތިޚާބުގެ އެމްޑީޕީ ޓިކެޓް ހޯއްދެވުމަށް ޝާހިދު ޕްރައިމަރީގައި ވާދަކުރައްވާނެކަން އިއުލާނު ކުރެއްވުމާ ގުޅިގެން ޕާޓީގެ ގިނަ އަދަދެއްގެ މެންބަރުން ދަނީ އޭނާއަށް ތާއީދުކުރާކަން ހާމަކުރަމުންނެވެ.
