މިރޭ މަޣުރިބު ނަމާދަށްފަހު މާލެ އާއި 23 ރަށެއްގައި ޒަކާތާ ބެހޭ ހާއްސަ ދަރުސްތަކެއް ބޭއްވުމަށް އިސްލާމިކް މިނިސްޓްރީން ހަމަޖައްސައިފިއެވެ.
އިސްލާމިކް މިނިސްޓްރީން ސިލްސިލާ ގޮތެއްގައި މިސްކިތު ދަރުސްތައް ބާއްވަމުން އަންނައިރު އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައި ވަނީ މިރޭ މަޣުރިބު ނަމާދަށްފަހު މާލެ އާއި 23 ރަށެއްގައި ޒަކާތާ ބެހޭ ހާއްސަ ދަރުސްތަކެއް ބޭއްވުމަށް ހަމަޖެހިފައިވާ ކަމަށެވެ. އެއީ މިވަގުތު އިލްމުވެރިން ތިއްބެވި ރަށްތައް ކަަމަށް ވެސް ޝަހީމް ވިދާޅުވިއެވެ.
“ޒަކާތުގެ މުހިންމުކަން” މި މައުލޫގެ މައްޗަށް ދޭ ދަރުސް އޮންނާނީ؛
- މާލެ
- ވިލިމާލެ
- ހުޅުމާލެ
- ހއ. އިހަވަންދޫ
- ހއ. ހޯރަފުށި
- ހއ. ކެލާ
- ހއ. މާރަންދޫ
- ހދ. ކުޅުދުއްފުށި
- ށ. ޅައިމަގު
- ށ. ފޯކައިދޫ
- ނ. މާފަރު
- ރ. ފައިނު
- ރ. ރަސްގެތީމު
- ރ. ހުޅުދުއްފާރު
- އއ. ތޮއްޑޫ
- އދ. ދަނގެތި
- ދ. ކުޑަހުވަދޫ
- ގދ. ތިނަދޫ
- ޏ. ފުވައްމުލައް
- ސ. ހިތަދޫ
- ސ. ފޭދޫ
- ސ. ހުޅުދޫ
- ސ. މީދޫ
މިއަދުގެ ހުކުރު ހުތުބާ ވެސް ހާއްސަ ކޮށްފައި ވަނީ މުދަލު ޒަކާތް ދެއްކުމުގެ މުހިންމުކަމުގެ މައްޗަށެވެ. ހުތުބާގައި ވަނީ މުސްލިމުންގެ މުދަލުން ޒަކާތަށް ކަނޑައެޅިފައިވާ މިންވަރު ނެރުމަކީ އިސްލާމްދީނުގެ ރުކުނެއް ކަމުގައިވީއިރު، ޒަކާތް ވާޖިބުވެއްޖެ ކޮންމެ މީހަކުމެ، ތިމާގެ މުދަލުން ޒަކާތް ދައްކަން ޖެހޭނެކަން ފާހަގަކޮށް، މުދަލު ޒަކާތް ދެއްކުމުގައި ފަރުވާ ކުޑަނުކޮށް ދީނީ މި ވާޖިބު ފުރިހަމަ ގޮތުގައި އަދާކުރުމަށް ނަސޭހަތްތެރިވެ އެކަން ކުރުމަށް ގޮވާލާފައެވެ.
