މާލެ ޓެކްސީ ލައިން އެޕްލިކޭޝަން ބޭރުގެ އެއްވެސް ފަރާތަކުން ހެކްކޮށްފައި ނުވާ ކަމަށާއި، އެޕްލިކޭޝަންގައި ހުރި މައުލޫމާތުތަކަށް ބަދަލުގެނެސް އެ މަޢުލޫމާތު ލީކުކޮށްލާފައިވަނީ ކުންފުނީގައި މަސައްކަތް ކުރަމުން އަންނަ މުވައްޒަފަކު ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
މި މައްސަލައާ ގުޅިގެން އެމްޓީސީސީން ނެރުނު ނޫސްބަޔާނެއްގައި ބުނެފައިވަނީ، އެޕުގެ ބެކްއެންޑް ޑޭޓާބޭސް ސިސްޓަމުގައިވާ މައުލޫމާތުތަކަށް ބަދަލު ގެނައުމަށްފަހު، އެ މައުލޫމާތުތަކުގެ ސްކްރީންޝޮޓް ނަގައި އާންމުކޮށްފައިވަނީ އެ ކުންފުނީގެ މުވައްޒަފެއްކަން އެތެރޭގެ ތަހުގީގުން ވަނީ ކަށަވަރުކުރެވިފައިވާ ކަމަށެވެ. އޭނާގެ މި އަމަލަކީ ކުންފުނީގެ އެއްވެސް ހުއްދައެއް ނެތި، އަމިއްލަ ޒާތީ އަދި ސިޔާސީ މަގުސަދެއް ހާސިލުކުރުމުގެ ބޭނުމުގައި ކޮށްފައިވާ ކަމެއް ކަމަށް ވެސް އެ ކުންފުނިން ފާހަގަކުރިއެވެ.
މި ބަދަލުތައް ކުންފުނީގެ އައިސީޓީ ނެޓްވޯކް ސެކިއުރިޓީ ޓީމުގެ ސަމާލުކަމަށް އައުމާއެކު، ވަގުތުން ފިޔަވަޅު އަޅައި ސިސްޓަމް ނިއްވާލުމަށްފަހު ސެކިއުރިޓީ ލޮކްޑައުންއަކަށް ގެނެވުނު ކަމަށް އެމްޓީސީސީން ބުންޏެވެ. އަދި ކުންފުނީގެ ސާވަރ އާއި މާލެ ޓެކްސީ ލައިންގެ ބެކްއެންޑް ސިސްޓަމް ރޭގެ 23:30 ހާއިރު ރައްކާތެރިކަމާއެކު އަލުން ރީސްޓޯރކޮށް، ސަލާމަތީ ކަންކަން ކަށަވަރުކޮށްފައިވާ ކަމަށް ވެސް އެ ކުންފުނިން ވަނީ ބުނެފައެވެ.
އެމްޓީސީސީން ބުނީ، މިއީ ބޭރުގެ ފަރާތަކުން އެޕްލިކޭޝަންގެ ފަޔަރވޯލްއަށް ހަމަލާއެއްދީގެން ހިންގާފައިވާ ހެކުކުރުމުގެ އަމަލެއް ނޫން ކަމަށެވެ. މިކަމާ ގުޅިގެން ކަސްޓަމަރުންނަށް ޓެކްސީ ލައިންގެ ހިދުމަތް ހޯދުމުގައި އެއްވެސް ދަތިކަމެއް ކުރިމަތިނުވާނެ ކަމުގެ ފުރިހަމަ ޔަގީންކަން ވެސް އެމްޓީސީސީން ވަނީ ދީފައެވެ.
މިކަން ކުރި މުވައްޒަފު ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާކަން ހާމަކުރަމުން އެމްޓީސީސީން ބުނެފައިވަނީ ކުންފުނީގެ ގަވާއިދުތަކާއި އުސޫލުތަކުގެ ދަށުން، އެ މުވައްޒަފާމެދު އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށެވެ.
އެމްޓީސީސީން އިތުރަށް ބުނެފައިވަނީ މިފަދަ އަމަލުތަކުގެ މައިގަނޑު ބޭނުމަކީ، އެތައް އަހަރެއްގެ ބުރަ މަސައްކަތުން ކުންފުނިން ހޯދާފައިވާ ރައްޔިތުންގެ އިތުބާރާއި ރީތި ނަން ކިލަނބުކޮށްލުން ކަމަށެވެ. ނަމަވެސް ކަސްޓަމަރުންނާއި ހިއްސާދާރުންގެ ހައްގުތައް ރައްކާތެރިކުރުމުގައި އެ ކުންފުނިން ސާބިތުކަމާއެކު ދެމިއޮންނާނެ ކަމުގެ ފުރިހަމަ ޔަގީންކަން އެމްޓީސީސީން ވަނީ އަރުވައިފައެވެ.
