ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރުކަމުގެ މަގާމަށް އައްޔަންކުރެއްވުމަށްޓަކައި ދެ ބޭފުޅެއްގެ ނަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވައިފިއެވެ.
ރައީސުލްޖުމްހޫރިއްޔާ މަޖިލީހަށް ފޮނުއްވި ސިޓީފުޅުގައި ހިމެނޭ ދެ ބޭފުޅުންނަކީ:
- ހ. މީނާޒު، ޝަމްޢޫން ހަމީދު
- ގދ. ތިނަދޫ، އަސޭގެ، އަލްއުސްތާޛާ ސަމާއު އަޙުމަދު ނަޖީބު
އެޗްއާރްސީއެމްގެ މެންބަރުކަމުގެ ފުރުސަތު ރައީސުލްޖުމްހޫރިއްޔާގެ އޮފީހުން ހުސްވި ޖުލައި މަހު ހުޅުވާލެއްވީ، މިހާރުގެ މެންބަރެއްގެ ދައުރު ހަމަވާތީއެވެ. އެގޮތުން، މިހާރު ވެސް އެ ކޮމިޝަނުގެ މެންބަރެއްގެ ގޮތުގައި ހުންނެވި އަލްއުސްތާޛާ ސަމާއު އަޙްމަދު ނަޖީބުގެ ދައުރު އަންނަ އޮކްޓޫބަރު މަހުގެ 3 ވަނަ ދުވަހަށް ހަމަވާނެއެވެ. މަޖިލީހަށް ނަން ފޮނުއްވި އަނެއް ބޭފުޅެއް ކަމުގައިވާ ޝަމްޢޫން ޙަމީދަކީ ވެސް އެ ކޮމިޝަނުގެ އިސް މަގާމުތަކެއް ފުރުއްވައި، އެ ދާއިރާއިން ގިނަ ތަޖުރިބާތަކެއް ހާސިލުކުރައްވާފައިވާ ބޭފުޅެކެވެ.
ރައީސުލްޖުމްހޫރިއްޔާ ފޮނުއްވި މި ނަންތައް އިތުރަށް ދިރާސާކުރުމަށްޓަކައި، ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް މިހާރު ވަނީ ފޮނުވައިފައެވެ. އެޗްއާރްސީއެމްއަށް މެންބަރަކު އައްޔަންކުރެވޭނީ، ކޮމިޓީ މަރުހަލާގައި މި ނަންތައް ދިރާސާކޮށް ނިންމުމަށްފަހު، މަޖިލީހުގެ ތަޅުމުގައި ނަގާ ވޯޓަކުން ފާސްވެގެންނެވެ.
