ހެންވޭރު ފަހިވައިގޭގައި ރޭ ހިނގި އަލިފާނުގެ ހާދިސާއާއި ގުޅިގެން ހަތަރު ދިވެއްސަކަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު ހަމަޖައްސައިދީފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އެންޑީއެމްއޭ އިން ބުނީ، އެހީތެރިކަން ފޯރުކޮށްދީފައިވަނީ އަލިފާން ރޯވި އިމާރާތުގެ ހަތްވަނަ ފަންގިފިލާގައި އެޕާޓްމަންޓުގައި ދިރިއުޅެމުން އަންނަ ތިން އަންހެނަކާއި ފިރިހެނަކަށް ކަމަށެވެ. ފަހިވައިގޭގައި އަލިފާނުގެ ހާދިސާ ހިނގާފައިވަނީ ރޭގެ ވަގުތެއްގައެވެ. އަދި ފުލުހުންނާއި އެމްއެންޑީއެފްއިން ގުޅިގެން ކުރެވުނު މަސައްކަތުން އަލިފާންގަނޑު އެއްކޮށް ނިއްވާލެވިފައިވަނީ ރޭ 21:25 ހާއިރުއެވެ.
މި ހާދިސާގައި އަލިފާން ރޯވެފައިވަނީ އެގޭގެ ހަތްވަނަ ފަންގިފިލާގައި ހުރި އެޕާޓްމަންޓުގެ ސިޓިންރޫމުގައެވެ. އެހެންކަމުން އެޕާޓްމަންޓުގެ ސިޓިންރޫމަށް ވަރަށް ބޮޑެތި ގެއްލުންތަކެއް ވަނީ ލިބިފައެވެ.
މި ހާދިސާގައި އެ ގޭގައި ދިރިއުޅޭ އެއްވެސް މީހަކަށް އަނިޔާވެފައި ނުވި ނަމަވެސް އަލިފާން ނިއްވުމުގައި ހަރަކާތްތެރިވި ފުލުހެއްގެ އަތް ކަނޑައިގެންގޮސް އަނިޔާވުމާ ގުޅިގެން، އޭނާއަށް އޭޑީކޭ ހޮސްޕިޓަލުގައި ފަރުވާދިނެވެ. ނަމަވެސް، ފުލުސް މީހާއަށް ސީރިއަސް އަނިޔާއެއްވެފައި ނުވާ ކަމަށް ފުލުހުން ބުންޏެވެ.
އެންޑީއެމްއޭ އިން އިތުރަށް ބުނެފައިވަނީ، މި ހާދިސާގެ ސަބަބުން އެ އިމާރާތުގެ ބައެއް އެހެން ފަންގިފިލާތަކަށް ދުމުގެ އަސަރު ފޯރި ކަމަށާއި ނަމަވެސް، އެ އެޕާޓްމަންޓްތަކަށް މާބޮޑެތި ގެއްލުމެއް ލިބިފައި ނުވާ ކަމަށެވެ.
