އިސްލާމް ދީނާ ހިލާފު ގާނޫނޭއް ރާއްޖޭގައި ވުޖޫދު ނުކުރެވޭ ގޮތަށް ރައްޔިތުންގެ މަޖިލީހަށް އިސްލާހެއް ހުށަހަޅުއްވަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ ރާއްޖެ ފަދަ ސައްތައިން ސައްތަ މުސްލިމް ގައުމެއްގައި ކޮންމެހެން ލާޒިމު ނިންމުމެއް ކަމަށް މަޝްހޫރު ދީނީ އިލްމުވެރިޔާ އަޙްމަދު ސަމީރު ވިދާޅުވެއްޖެއެވެ.
ގައުމީ ދުވަހުގެ މުނާސަބަތުގައި އުތީމުގައި ބޭއްވި ރަސްމީ ޖަލްސާގައި ވާހަކަދައްކަވަމުން ރައީސް މުޢިއްޒު ވިދާޅުވީ، އިސްލާމްދީން ހިމާޔަތްކުރެވޭނެ ފުރިހަމަ ނިޒާމެއް ގައުމުގައި ފުރިހަމައަށް ގާއިމުވެފައި އޮތުމަކީ ކޮންމެހެން ބޭނުންތެރި ކަމެކެވެ. ރާއްޖޭގެ ގާނޫނުއަސާސީގައިވާ ފަދައިން، އިސްލާމްދީނުގެ އަސްލުތަކާ ހިލާފު އެއްވެސް ގާނޫނެއް ރާއްޖޭގައި ނުހެދޭނެކަން ފާހަގަކުރައްވައި، ހުރިހާ ގާނޫނުތަކާއި ގަވައިދުތަކެއް އެކުލަވައިލަންވާނީ ދީނީ އިންތަކުގެ ތެރޭގައި ކަމަށް އެމަނިކުފާނު ވިދާޅުވިއެވެ.
ނަމަވެސް، މިފަދަ ހަރުދަނާ ނިޒާމީ އޮނިގަނޑެއް ނެތްކަން ފާހަގަކުރައްވަމުން ރައީސް ވިދާޅުވީ، އެކަން އިސްލާހުކުރެއްވުމަށް ގަސްތުކުރައްވާ ކަމަށެވެ. އެގޮތުން އިސްލާމްދީނާ ފުށުއަރާ އެއްވެސް ގާނޫނެއް އުފަން ނުކުރެވޭނެ ފަދަ ވަރުގަދަ ނިޒާމެއް، އުސޫލީ އަދި ނިޒާމީ ގޮތުން ކަށަވަރުކުރުމަށް މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ދެއްވިއެވެ.
މިކަމާ ގުޅިގެން މީސް މީޑިއާގައި ހިއްސާކުރެއްވި ވީޑިއޯ މެސެޖެއްގައި ޝެއިހް ސަމީރް ވިދާޅުވީ, މިއީ ރާއްޖެ ފަދަ ސައްތައިން ސައްތަ މުސްލިމު ގައުމެއްގައި ކޮންމެހެން ލާޒިމު ކަމެއް ކަމަށެވެ. ދީނާ ހިލާފު ގާނޫނެއް ނެހެދޭނެކަން ގާނޫނުއަސާސީގައި ބަޔާންކޮށްފައިވާ ކަމަށާއި ނަމަވެސް, އެކަން ގާނޫނުތަކުގައި އެކުލެވިގެންވާކަން ކަށަވަރުކުރެވޭ ފުރިހަމަ ނިޒާމެއް ނެތް ކަމަށް ޝެއިހް ވިދާޅުވިއެވެ.
”އެހެންވީމަ ގާނޫނުއަސާސީގައި ބަޔާންކޮށްފައިވާ ފުރިހަމަ ދައުލަތެއްގެ ގޮތުގައި އިސްލާމީ އުސޫލުތަކަށް ތަބާވާ, އިސްލާމީ ހަމަތަކާއި އުސޫލުތަކުގެ ތެރެއިން ހިނގާ ދައުލަތެއްގެ ގޮތުގައި މި ގައުމު އޮތުމަށްޓަކައި މި އަސާސަކީ ވަރަށް މުހިންމު ކަމެއް,“ – ޝެއިހް ވިދާޅުވިއެވެ.
ޝެއިހް ސަމީރު އިތުރަށް ވިދާޅުވީ, ބޮޑުތަކުރުފާނަކީ އިސްލާމްދީނުގެ އުސޫލުތައް ރާއްޖޭގައި ހިފަހައްޓައި ނެގެހެއްޓުމަށް ވަރަށް ބޮޑަށް ބާރު އެޅުއްވި ބޭފުޅެއް ކަމަށާއި އެ ބޭފުޅާގެ ހަނދާން އާކުރެވޭ މަގާމެއްގައި މިފަދަ ހަބަރަކީ ވަރަށް އުފާވެރި ހަބަރެއް ކަމަށެވެ. މެސެޖް ނިންމަވާލައްވަމުން ޝެއިހް ވަނީ ރައީސްގެ މި ނިންމެވުމަށް ޝުކުރު އަދާކުރައްވައިފައެވެ.
